Ich Jacob der Hafner von der Newenstat. und ich Pericht sein hausvrowe . Wir vergehen und tuen chunt allen den die disen brief lesent oder hoerent lesen die nu lebent und hernach chuenftich sint . daz wir mit unser erben gueten willen und gunst mit gesampter hant zue der zeit do wir iz wol getun mochten. und mit unsers Gruntherren hant . hern Jansen dez Greiffen Recht und redleich verchauft und geben haben unser haus daz da leit under den Hafnern ze wienne ze naehst unserm haus da wir alebenst selber inne sein . da man alle iar von dient hern Jansen dem Greiffen ainen wienner phenninge ze Gruntreht . und dem Greiffenstainer fuenf und zwaintzich phenninge ze purchreht und nicht mer . Mit allem dem nutz und recht alz wir ez in Gruntrehtes und in Purchrehtes gewer her pracht haben . umb sechs phunt wienner phenninge der wir recht und redleich gewert sein . Ulreichen dem Stuechssen und seiner hausvrowen vron Katreyn und irn erben . fuerbaz ledichleichen und vreileichen ze haben und allen irn frumen da mit ze schaffen verchauffen versetzen und geben swem si wellen an allen irresal . und sein auch wir dez vorgenanten haus ir recht gewern und scherm fuer alle ansprach alz Gruntrehtes und Purchrehtes recht und der stat recht ze wienne . und daz diser chauf fuerbaz also staet und unzerbrochen beleibe . und wand wir selber nicht aigens Insigils haben so geben wir in disen brief zu einem urchuende und zu einer ewigen vestnunge versigilt mit dez vorgenanten unsers Gruntherren Insigil hern Jansen dez Greyffen der diser sache gezeuge ist mit seinem Insigil . Diser brief ist geben ze wienne nach Christes gepurt dreutzehen hundert iar dar nach in dem dreu und dreizgisten iar an sand Jacobs Tage.

Source Fulltext: Peter Peusquens