Johannes episcopus servus servorum dei, dilecto filio Johanni, nato dilecti filii Ditrici Chempsonis clerico Pataviensis diocesis, Salutem et apostolicam benedictionem. Exigentibus tue probitatis meritis, super quibus apud nos laudabile tibi testimonium perhibetur inducimur, ut tibi reddamur ad graciam liberales. Hinc est quod nos volentes tibi, huiusmodi tuorum meritorum intuitu, graciam facere specialem, beneficium ecclesiasticum, cum cura, vel sine cura, cuius fructus redditus et proventus, si cum cura viginti, si vero sine cura fuerit, decem marcarum argenti valorem annuum, secundum taxationem decime non excedunt ad collationem vel provisionem seu presentationem aut quamvis aliam dispositionem venerabilis fratris nostri Episcopi Pataviensis pertinens si quod vacat ad presens, vel cum vacaverit, quod tu per te vel procuratorem tuum ad hoc legitime constitutum, infra unius mensis spacium postquam tibi vel eidem procuratori vacatio illius innotuerit, duxeris acceptandum, conferendum tibi post acceptationem huiusmodi cum omnibus iuribus et pertinentiis suis donationi apostolice reservamus. districtius inhibentes, eidem Episcopo ne de huiusmodi beneficio, interim etiam ante acceptationem eandem nisi postquam ei constiterit, quod tu vel procurator predictus, illud nolueritis acceptare, disponere quoquomodo presumat, ac decernentes ex nunc irritum et inane, si secus super hiis a quoquam, quavis auctoritate, scienter vel ignoranter, contigerit attemptari. Non obstantibus si aliqui super provisionibus sibi faciendis, de huiusmodi vel aliis beneficiis ecclesiasticis, in illis partibus speciales vel generales apostolice sedis vel legatorum eius litteras impetrarint, etiam si per eas ad inhibitionem reservationem et decretum vel alias quomodolibet sit processum. quibus omnibus preter quam auctoritate nostra, huiusmodi beneficia expectantibus, in eiusdem beneficii assecutione te volumus anteferri, sed nullum per hoc eis quo ad assecutionem aliorum beneficiorum preiudicium generari. seu si eidem Episcopo aut quibusvis aliis communiter vel divisim, ab eadem sit sede indultum quod ad receptionem vel provisionem alicuius minime teneantur, et ad id compelli non possint. quodque de beneficiis ecclesiasticis ad eorum collationem vel provisionem aut quamvis aliam dispositionem, coniunctim vel separatim spectantibus, nulli valeat provideri per litteras apostolicas non facientes plenam et expressam ac de verbo ad verbum de indulto huiusmodi mentionem, et qualibet alia dicte sedis indulgencia generali vel speciali cuiuscumque tenoris existat per quam presentibus non expressam vel totaliter non insertam, effectus huiusmodi gracie, impediri valeat, quomodolibet vel differri, et de qua cuiusque toto tenore, habenda sit in nostris litteris mentio specialis, seu quod pateris in etate deffectum, cum nondum in vicesimoquinto licet in vicesimo etatis tue anno vel circa illum constitutus ut asseris fare noscaris. Nos enim tecum ut eodem defectu, et qualibet constitutione contraria nequaquam obstantibus huiusmodi curatum beneficium libere recipere, et licite retinere valeas, de uberioris dono gracie dispensamus. Proviso quod huiusmodi curatum beneficium, si illud ante quam, ad etatem ad id aptam perveneris assequi te contingat, debitis interim non fraudetur obsequiis, et animarum cura in ipso nullatenus negligatur, quodque postquam in etate ipsa constitutus extiteris, te facias ad ordines prout ipsius beneficii cura requirit, statutis a iure temporibus promoveri. Nulli ergo omnino hominum liceat hanc paginam nostre reservationis inhibitionis, constitutionis et dispensationis infringere, vel ei ausu temerario contraire. Siquis autem hoc attemptare presumpserit, indignationem omnipotentis dei, et beatorum Petri et Pauli Apostolorum eius se noverit incursurum. Datum Avinione IIII Nonas Octobris Pontificatus nostri Anno decimo octavo.

Source Fulltext: Peter Peusquens