Ich Hainreich. der unverzaget. und Ich. Gerdraut sein hausvrowe. wir veriehen und tun chunt allen den. die disen prief lesent. oder horent lesen. die nu lebent oder hernach chunftich sint. daz wir mit unserr Erben gutem willen und gunst. mit verdachtem mute und mit gesampter hant. zu der zeit. da wir ez wol getun mochten. und auch mit unseres Gruntherren hant. Mychels des Schoenn Helfer. zu den zeiten. Maister dez Hauses datz sand Johans der Siechen alsse (in der herrenalzze / Spitalmeister von St. Johann in Hernals) vor Schotten Tor. Recht und redlichen verchauft haben. Dem Erbern. Geistlichen Manne. pruder Hermannen dem Chuedorfer. zu den zeiten. Comentewer. datz dem Deutschenhaus ze wienne. und seiner pruderschaft da selbens. und iren Nachchumen. zway Phunt wiener phenninge Geltes Ewiges purchrechtes. auff unserem hause. das da leit an dem Newen Marchte ze wienne ze naechst. Hainrichs haus. dez Pader. zu dem Phunde Purchrechtes. das wir in .e. gedient haben. und furbaz dienen schullen. von dem selben haus. das wir mit dem selben haus gechauft haben mit allem dem nutzze und rechte ze dienen. als purchrechtes recht ist. umb zwaintzich phunt wienner phenninge. der wir gar und gaentzlichen. verricht und gewert sein ledichlichen. und vreilichen ze haben. und furbaz allen iren frumen da mit ze schaffen. verchauffen versetzen. und geben swem seu wellen an allen irresal. so beschaidenlichen. daz wir jn. die vorgenanten zway phunt geltes purchrechtes. von dem egenanten unserm. haus uber al. dienen schullen alle jar zu drin zeiten. zu dem egenanten phunde. das wir jn .e davon gedient haben. oder swer daz selbe haus nach uns besitzzet. zehen und funf schillinge. an sand Mychels Tage. zehen und funf schillinge ze Weihennachten. zehen und funf schillinge an sand Georgen Tage. mit allem dem nutzze und rechte als man ander purchrecht dient. in der stat ze wienne. Und durch pezzer sicherhait. so setzzen wir uns. Ich vorgenanter Hainrich der unverzagt und Ich Gerdraut sein hausvrowe. unverschaidenlichen. mit sampt unsern Erben. dem egenanten pruder Hermann. dem Chuedorffer. Comentewer daz dem Deutschenhaus ze wienne und seiner pruderschaft. da selbens. uber die vorgenanten zway phunt. purchrechtes. zu sampt dem egenanten phunde daz jn e dar auffe leit ze rechten geweren und scherm fur alle ansprach. als purchrechtes recht ist. und der stat recht ze wienne. und geben jn dar uber disen prief zu einem offen urchunde versigelten. mit des vorgenanten. hauses Insigel. von sand Johannes der Siechen alsse den man dient alle jar. an aynen helbelinch zwaintzich wienner phenninge ze Grunt recht. und mit des Erbern Ritters Insigel. hern. Reinhartes des Zaunruden. die diser sache gezeuge sint mit iren Insigeln. Diser prief ist geben ze wienne nach Christes gepurt dreutzehen hundert jar dar nach in dem vier und dreizzigistem jar. an sand Johannes abent ze Sunnewenden.

Source Fulltext: Peter Peusquens