Ich Chunrat ouf dem Gange von Eberstorf, und ich Chunigunt sein Housvrowe Wir vergehen und Tuen chunt allen den die disen prief lesent, oder horent lesen, die nu lebent, und hernach chumftig sint. Das wir mit unser Erben guetem willen und gunst, und mit unsers Perchherren hant, des Erbern mannes, hern Jansen von Ibs, ze der zeit da wir ez mit gesampter hant an alle irrunge wol getuen mochten, recht und redleichen haben verchouft und geben, Ein halbes Jeuch an ein drittayl eines viertayls weingarten, leit ze naest des Erbern Rytters hern Reynprechtes des Zounruden weingarten, an der Obern Durren Waerinch. Der mich vorgenanten Chunigunden von meinem Enen hern Ernsten dem Mouter ist anerstorben dem Got gnade, und der mir gegen andern Erben, mit rechter furtzicht und mit Loz an meinem Tayl ist gevallen. Do von man alle jar dient in dem Lesen, ze perchrecht nuer dreu viertayl und zwo staeuf weins, und fumf Ort ze voytrecht und nicht me. Den selben weingarten haben wir recht und redleichen verchouft und geben mit alle dem nutz und rechten, alz in unser vodern und ouch wir ine danne recht Tage, unversprochenleichen in rechter perchrechtes gewer her pracht haben umb drithalbs und zwaintzich phunt wienner phenninge der wir schon und erleichen verricht sein und gewert. Dem Erbern manne hern Seyfriden dem Sparnramft, purger ze Wienne, und vron Preyden seiner housvrowen und irn Erben furbas ledichleichen und vreyleichen ze haben und allen irn frumen da mit ze schaffen, versetzen, verchoufen, und geben wem si wellen, alz ez in gar wol chom und fuege an allen irsal und an allen chrieg. Wir schullen ouch in, den weingarten furbas in rechter gewerschaft vreyn und scherm vor aller ansprach, und vor allem chrieg, alz Perchrechtes und des Landes recht ist in Osterreich. Und was in dar an abget, oder furbas abgienge da von si schadhaft wurden wie das genant ist das schaden mag gehaizzen, den si mit irn trewen mugen gesagen, den selben schaden mit sampt dem weingarten schulle wir in, gar und gaentzleichen ablegen und wider cheren, an alle chlag, an alles furbot, und an alles gericht. Und das schullen si haben ouf uns, ouf unsern trewen, und ouf alle unserm guete, wie daz genant ist, das wir haben in Osterreich, oder wo wir ez haben, wir sein lebentig, oder Tot. Und geben in unverschaidenleichen dar uber disen prief ze einem offen und waren urchunde und ze einer Ewigen vestnunge diser sache versigelt mit unserm insigel. Und mit der Erbern Leut insigel, hern Jansen von Ibs unsers vorgenanten percherren, unsers herren, hern Jansen hern Eberharts sun an dem Griez. und hern Gotfritz des Witz. Die diser sache gezeug sint mit irn insigeln. Der prief ist geben nach Christes geburde dreuzehen hundert jar, in dem fumf und dreyzigesten jare, des naesten Eritages nach sant Johans Tag, alz er in das Oel wart gesatzt.

Source Fulltext: Peter Peusquens