Ich Jans der Chetnerinne aydem. Und ich Gerdraut sein Hausvrowe wir verichen und Tun chunt offenleichen an disem brif. daz wir mit unser erben gutem willen und gunst mit gesampter hant zu der zeit do wir ez wol getun mochten. und mit unsers pergmaisters hant hern Stephans von der Neunstat Recht und redleichen verchauft und geben haben. Meiner swiger vrown Elzpeten der Chetnerinne ainen weingarten das dreu achtail ist leit an dem Spiegel ze nechst Ulreichs weingarten des Cheser und do man alle iar von dient dem probst ze Neunburch dreu achtail weins fur perchrecht. und nicht mer. den selben weingarten haben wir der Egenanten vrown Elspeten und iren Erben verchauft und geben fur funf und zwaintzich march silbers wienner gewichts. die si uns vor manigen zeiten an rechten naten ze fuedring berait gelihen hat. furbaz ledichleichen und vreileichen ze haben und allen iren frumen do mit ze schaffen verchaufen versetzen geben swem si welle an allen irresal. wir sein auch unverschaidenleichen mit sampt unsern Erben des Egenanten weingarten ir recht gewer und scherm fur alle ansprach als perchrechts recht ist und des landes recht in Osterreich . und des ze urchund geben wir ir disen brif versigelt mit unserm insigel . und mit unsers Egenanten perigmaisters insigel hern Stephans von der Neunstat der diser sache gezeug ist mit seinem insigel. Diser brif ist geben ze Wienne Nach Christes gepurt dreutzehen hundert iar. dar nach in dem funf und dreizzigistem iar an sande Veyts abent.

Source Fulltext: Peter Peusquens