Ich Hainreich der pader under den Hafneren ze Wienne. Und ich Margriet sein Hausvrowe. Wir verichen und Tun chunt allen den die disen brif lesent oder horent lesen. die nu lebent und her nach chunftig sint, daz wir mit unser Erben gutem willen und gunst mit gesampter hant zu der zeit do wir ez wol getun mochten und mit unsers Gruntherren hant des Erbern Ritter hern Jansen des Greyffen recht und redleichen verchauft haben ain phunt wienner phennig gelts purchrechts. auf unser pastuben die do leit under den Hafneren ze wienne do man alle iar von dient hern Jansen dem Greiffen acht phennig ze Gruntrecht und hern Andren dem Chrannest pharrer ze Rueprechtshofen Neun phunt und hern Wilhalm bei dem prunne drithalb phunt allez ze rechtem purchrecht und nicht mer. Ez ist auch daz selbe phunt Gelts allerierlichen ze dienen ze den Tegen. achtzich phennig an sande Michels Tag. achtzich phennig ze weinachten. achtzich phennig an sande Georgen Tag. und auch mit allem dem rechten ze dienen als Ewiges purchrechts recht ist und der stat recht ze wienne. daz haben wir verchauft und geben umb acht phunt wienner phennig. der wir gentzleichen und gar gewert sein. dem Erbern Manne hern Nyclasen dem Meserlein purger ze wienne und seinen Erben. furbaz ledichleichen und vreileichen ze haben und allen seinen frumen do mit ze schaffen verchauffen versetzen und geben swem er welle als im daz pest chome und fuege an allen irresal. Wir sein auch unverschaidenleichen mit sampt unsern Erben. des Egenanten phunt Gelts purchrechts sein recht und scherm fur alleu ansprach als purchrechts recht ist und der stat recht ze wienne. Und get im furbaz dar an icht abe mit recht, daz schol er haben unverschaidenleichen auf uns und auf allem dem gut daz wir haben in dem lande ze Osterreich wir sein lembtig oder Tode Und daz diser chauf furbaz also stet sei und unverwandelt beleibe. und wand wir selber nicht aygens insigels enhaben. dar uber geben wir im disen brief zu Einem offen urchunde. und zu Einer steten vestigung versigelt mit unsers Egenanten Gruntherren insigel hern Jansen des Greyffen und mit hern Perichtolts insigel des Pollen deu auch diser sache gezeug sint mit iren insigeln und ander Erber leut genuch. Diser brief ist geben ze wienne Nach Christes gepurt dreutzehen hundert iar. dar nach in dem funf und dreizzigistem iar an sande Gyligen Tage.

Source Fulltext: Peter Peusquens