Ich Pruder Walther an .. des priors stat datz den Augustinêrn ze Wienn Und wir der Convent gemayn daselbens vergehen fuer uns und unser Nachkomen offenleich mit dem brief, daz uns die erbern mann Hanns der Zyrnast und Hanns der Mosprunner dietzeit baid ausrichter und volfurêr des geschêffts so Hanns der Arnstorffer dem Got genad, getan hat, verrichtet und gewert habent zehen phunt wienner phenning die uns derselb Hanns der Arnstorffer geschafft hat, alls das selb geschefft vor dem Rat der Stat ze Wienn mit erber kuntschafft beweist ist und alls es ze einer ewigen gedechtnûzz in dem Statpuch geschriben stet. Also daz man die selben phenning tailen sol under die pruderschafft gemainkchleich die priester sind, daz Si Got umb des vorgenanten Hannsen des Arnstorffer Sel pitten und Mess darumb sprechen. Und sagen auch wir fur uns und unser Nachkomen die vorgenanten geschefftherren und Ir Erben der egenanten zehen phunt phenning gentzleich quidt ledig und los Mit urkund des briefs versigilten mit unser obgenanten .. priors und des Convents baiden aufgedrukchten Insigil. Geben ze Wienn an sand Petronellen tag Nach Kristi gepuerd viertzehenhundert jar darnach in dem Sybenten jar.

Source Fulltext: Peter Peusquens