Ich Eck Zenkgreff, von Eysfelt, Bekenne offenlichen und tun kunt mit diesem briffe allen den die yn sehen oder horen lesen, das ich von den erbern mannen Henreich Sachsenfelt, und Nicolae Weiswasser, burgern der Grosseren Stat zu Prage, geschefftleute, etwenn des Pertolds Cramer von Eysfelt, meines Oehems dem Got gnade, sulche Czehen schok grosser prager muntze, die mir derselb mein Oehem in seinem letzten gescheffte geschicket hat, mit bereitem gelde gantz und gar eyngenumen habe und enphangen, und dorumbe in meinem, meiner erben und aller meiner nachkomen willen und namen aller ansprach clage und manunge, die ich zu den vorgenanten geschefftleuten, und auch zu den kyndern desselben Pertoldes meines Oehems, allen iren erben und nachkomen, von sulcher Czehen schok grosser wegen, die ich enphangen habe, als oben begriffen ist, in allen gerichten beyde in geistlichen und werntlichen, in zukunfftigen tzeiten haben und tun mochte, derselben altzumal lasse und sage ich sie in crafft ditz brieffes nu und ewiclichen gantz und gar, quitt ledig und los, des tzu einem getzeugnisse, so haben die weisen manne, Jacob von Bruen Richter, Fridil Kussenpfenning, und Peter Habart gesworen burger und Schepfen, der obgenanten Stat tzu Prage, ire Sigelen, durch meiner bete willen an den briffe gehangen, der geben ist tzu Prage, Nach Christi gepurt viertzehenhundert Jar, und dornach in dem Newntem Jare am nechsten Freytag noch unsers liben herren Auffartz Tage.

Source Fulltext: Peter Peusquens