WIR Albrecht und Ott. von Gots gnaden, Hertzogen ze Oesterreich, ze Steyr, und ze Chernden, veriehen und tuen chunt, offenlich, mit disem prief, daz wir unsern getrewen lieben, den purgern ze Wienn. gemainlich, unsern werd, daselbs, ze Wienn. versatzt haben, fuer sechshundert phunt, wienner phenning, also, daz seu den, innehaben und niezzen sullen, untz daz wir, unser erben, oder unser nachchomen, denselben werd, umb die vorgeschriben phenning von in, ledgen und loesen. Wer auch, daz seu, ander unser werde, die bey dem vorgenanten werd oder darumb, gelegen sint, an sich loesten, die sullen seu ouch inne haben und niezzen. Und sullen wir, in, unser erben, oder unser nachchomen, wenn wir den oftgenanten werd, umb die e geschriben sechshundert phunt, von in loesen, daz guet, dar umb seu, die andern werde geloeset hetten, ouch gentzlich widercheren und richtten. Und daz in daz von uns, unsern erben, und unsern nachchomen, stet, und untzerbrochen beleibe, geben wir in disen prief, besigelten, mit unsern Insigeln. Der geben ist ze wienn. an sand Philipps, und sand Jacobs tag, do man zalt, von Christes geburte, dreuzehenhundert jar. dar nach in dem siben und dreizzigestem jare.

Source Fulltext: Peter Peusquens