Ich Jacob der Hert und ich Petir sein sun und ich Wolfhart sein sun. Ich Gatrey sein Tochter und ich Greymolt sein aydem und ich Agnes sein hausvrow. vergehen und tun chunt allen den die disen brief lesent oder horent lesen die nu lebent oder hernach chunftig sint daz wir mit unserr guten willen und gunst mit verdachtem muet mit gesampter hant. ze der zeit da wir ez wol getun mochten und mit unsers perchmaister hant Petirs dez Stebler recht und redleich verchauft haben dem Erbern Manne Chunraden dem Wiltwercher purger ze wienn und vron Mergarten seiner hausvrowen und allen iren Erben sechz phunt geltez Ewigez purchrechtz auf unserm weingarten der da leit ze Obern Chritzendorf und haist daz winternest dez anderthalb jeuch ist und leit ze nest dez smuchenphenninges weingarten da von man dienn aller jar in dem lesen sibenthalben phenning wienner muentz ze voitrecht und nicht mer. die selben sechz phunt geltez hab wir im geben um zway und viertzig phunt wienner phenning der wir gantz und gar gewert und verricht sein. Daz selb purchrecht schulle wir im dienn ze dreyn zeiten in dem jar als purchrechtz recht ist an sand Michels tag zway phunt. ze weinachten zway phunt und an sand Jorgen tag zway phunt. wer avir daz wir im daz vorgenant purchrecht nicht diennen ze den Tegen als vor geschriben sten so schulle wir im ze rechte sten in der purger schran ze wienn und schol alle weg nach der ersten clag ein zwispil darauf gen und darnach uber viertzehen tag so schol avir alleweg ein zwispil darauf gen er clag oder nicht so lang untz daz der weingart nicht bezzer ist. so schol er sich dan fuerbaz mit unserm guten willen dez egenanten weingarten underwinden und allen seinen frumen damit schaffen als im daz aller best fueg und chom. und sey wir auch mit sampt unsern Erben dez selben purchrechtz sein rechter gewer und scherm fuer allen irsal und ansprach als purchrechtz recht ist und der stat recht ze wienn. wer auch daz ich vorgenanter Jacob oder Greymolt oder unser Erben nach zwaier erber Manne rat im sechz ander phunt geltez chaufen innerhalb der mawer die als gut und gewiz wern als die sein so schol unser egenanter weingart von im ledig und vrey sein. und daz die red und der chauf fuerbaz also stet und untzebrochen bleib dez geb wir im disen brief ze einem urchuend und ze einem waren gezeug diser sache versigelt mit unserr aller viern ingesigel und mit unsers Egenanten perchmaisters ingesigel Peters dez Stebler der diser sache zeug ist und ander frume leute genug. Diser brief ist geben nach christez burth dreutzehen hundert jar darnach in dem siben und dreizzigisten jar an sand Jacobs tag.

Source Fulltext: Peter Peusquens