Ich Jans von der Ygla purger ze wienne und ich Margret sein hausvrowe und unser erben. Wir vergehen und tuen chunt allen den die disen brief lesent oder hoerent lesen. die nu lebent und hernach chuenftich sint. daz wir unverschaidenleich gelten soln. den erbern Leuten hern Johansen dem Taeusmer und hern Hainreichen seinem prueder purger ze auspurch und irn erben. Sechtzich march silbers. daz si uns durch irr trewen willen beraits gelihen habent. und dez wir si mit Golde gewert solden haben alz hernach geschriben stet. vor den phingsten die naehst gewesen sint vor einem jar. Nu habent si durch ir beschaidenhait und durch erber leut gepet willen. uns umb daz egenant silber taege gegeben. daz wir si dez an alle wider rede richten und wern suln mit Golde zwaintzich march an sant Michels tage der schierist chuemt. und zwaintzich march an sant Michels tage der dar nach schierist chuemt. und zwaintzich march an sant Michels tage der aber dar nach schierist chuemt immer ein karat Goldes fuer zehenthalb lot silbers. waer aber daz unser dinch waeger wurde. und daz uns got ee gelts beriet, so suln wir si denne dez vorgenanten jrs gutes ee wern. daz lueben wir in an alles gevaer mit unsern trewen. und haben jn fuer daz egenant ir Gelt ze phant gesatzt mit aller unser erben gueten willen und gunst mit verdachtem muet und mit gesampter hant zu der zeit do wir iz wol getun mochten. und mit unsers Gruntherren hant dez erbern Ritter hern Jansen dez Greyffen. unser haus daz da leit in der wolzeil ze wienne ze naehst Dietreichs haus an dem stege. und da man alle iar von dient hern Jansen dem Greyffen sechsthalben wienner phenninge ze Gruntrecht. und hern Herman dem Snaetzlein zway phunt wienner phenninge ze Purchrecht und nicht mer. Also mit aufgenomener rede swelhem sant Michels Tage und vorbenant ist. wir si zwaintzich march silbers mit golde nicht richten und wern alz vor verschriben ist. so sol in denne daz egenant unser haus umb die selben zwaintzich march silbers dez naehsten tages dar nach ledichleichen vervallen sein zu einem rechten chaufguet. da mit denne fuerbaz allen irn frumen schaffen verchauffen versetzen und geben swem si wellen an allen irresal. und suln auch wir noch unser erben denne furbaz auf daz selbe haus nimmer mer dehainen chriege noch dehain ansprach gehaben noch gewinnen weder vil noch wenig. Und dar ueber durch pezzer sicherhait so setzen wir uns. ich vorgenanter Jans von der Ysla und ich Margret sein hausvrowe und unser erben unverschaidenleich ueber daz vorgesprochen haus in dem recht alz vorverschriben ist. den egenanten hern Johansen und hern Hainreichen den pruedern den Taeusmern und irn erben zu rechtem gewer und scherm fuer alle ansprach alz Gruntrehtes und Purchrehts recht ist. und der stat reht ze wienne. Waer aber daz si mit recht an dem selben haus dehainen chriege oder ansprach gewunnen von wem daz waer. waz si dez schaden nement daz ir ainer bei seinen trewen gesagen mage. daz suln wir in alles aus richten und wider chern an alle ir mue und an allen irn schaden. Und suln auch si daz haben auf uns und auf allem unserm guet daz wir haben in dem Lande ze Oesterreich oder swo wir ez haben swie so daz genant ist wir sein lebentich oder tode. wir lueben auch mit unsern trewen swer uns mit disem brief an ir stat mant daz wir dem alles dez gepunden suln sein ze laisten und ze volfuern ze gleicher weis alz in selber. und auch alles daz recht sul haben daz vor an disem brief geschriben stet. Und geben in dar ueber disen brief zu einem warn urchuende und zu einem gezeuge. diser sache versigilt mit unserm Insigil. und mit unsers Gruntherren Insigil hern Jansen dez Greiffen. und mit hern Leupolts Insigil dez Hirnpreche mein vorgenanten Margreten prueder. und mit hern Rutgers Insigil dez wenigen hern Leupolts sun die diser sach gezeuge sint mit irn Insigiln. Diser brief ist geben ze wienne nach Christes gepurt dreuzehen hundert iar dar nach in dem siben und dreizgisten iar dez naehsten Mittichens nach sant Michels Tage.

Source Fulltext: Peter Peusquens