Ich Fridreich der Meller. und ich Katrey sein hausvrowe. Wir veriehen und tuen chunt allen den die disen brief lesent oder horent lesen. die nu lebent und her nach chunftig sint daz wir mit unser Erben gutem willen und gunst mit gesampter hant zu der zeit do wir ez wol getuen mochten und mit unsers pergmaisters hant otten von uetelndorf der herren amptman von aller heyligen tal ze Mawerbach des ordens von karthus Recht und redleichen verchauft haben ain phunt wienner phening gelts purchrechts auf unserm weingarten des ain halbs ieuch ist leit ze ueteldorf an dem spiegel ze nest Hainreichs weingarten des trager. da von man alle iar dient den herren ze Mawerbach ainen Emmer weins ze perchrecht und drei phening ze voytrecht und nicht mer Ez ist auch daz Egenant phunt gelts allerierleichen ze dienen ze drin Tegen ze weinachten an sande Jorgen Tage und an sande Michels Tage ze einem igleichen voerbenanten tag achtzich phennig als purchrechts recht ist und der stat recht ze wienne und ist auch abe ze losen zwischen hinne und sande Michels Tage der nu schirist chumt mit einem als guetem phunt gelts purchrechts daz als wol gelegen ist als daz phunt gelts. Geschicht des nicht so ist ez furbaz ewich auf dem weingarten. daz haben wir verchauft und geben umb siben phunt phening der wir gar und gentzleichen gewert sein. dem Erbern manne hern Perchtolten dem Pollen purger ze wienne und vrouen Margreten seiner hausvrouen und iren Erben furbaz ledichleichen und vreyleichen ze haben und allen ieren frumen do mit ze schaffen verchauffen versetzen geben swem seu wellen an allen ieresal. Wir sein auch unverschaidenleichen mit sampt unsern Erben des vorgesprochen phunt gelts ir recht gewer und scherm fuer alle ansprach als purchrechts recht ist und der stat recht ze wienne. und get in fuerbaz dar an icht abe mit recht daz schullen seu haben unverschaidenleichen auf uns und auf allem dem guet. daz wir haben in dem lande ze osterreich wir sein lembtig oder tode. Und wand wir noch unser Egenanter pergmaister ott nicht aygener insigel enhaben. dar uber geben wir in disen brief zu Einem offen urchunde. und zu Einem waren gezeuge versigelt mit des Prior und Convents chlainem insigel ze Mawerbach, und mit hern Nyclas insigel, des Meserleins deu diser sache gezeuge sint mit iren Insygeln und ander erber leut genuech. Diser brief ist geben ze wienne Nach Christes geburde dreutzehen hundert iar. dar nach in dem siben und dreizzigistem iar des nachsten Phintztags vor sand Cholmans Tage.

Source Fulltext: Peter Peusquens