Ich Ott bey dem Prunne und ich Elzbeth sein hausvrowe wir veriehen und tuen chunt allen den die disen brief lesent oder horent lesen. die nu lebent und her nach chunftig sint. daz wir mit unser Erben guetem willen und gunst mit gesampter hant zu der zeit do wir ez wol getuen mochten und mit unsers Gruntherren hant hern Rugers des wenigen - Leupolts sun Recht und redleichen verchauft haben zehen schilling wienner phennig gelts purchrechts. die wir gehabt haben auf Fridreichs haus des pechen von Medlich daz da leit in der Chrugstrazzen zenest der valwacherinne haus da von man alle iar dint hern Rugern des wenigen Leupolts sun funftzehen phening ze Gruntrecht und in der purger spital achthalben schillinch ze purchrecht und nicht mer. Ez ist auch die Egenant gult allerierleichen ze dienen ze drin Tegen an sande Jorgen tage an sande Michels tage und ze weinachten ze einem igleichen vorbenantem tage zehen und drey schillinge als purchrechts recht ist und der stat recht ze wienne. und wand die Egenant gult ist alt ze losen gewesen. und alle gult die alt ze losen ist, varende guet ist. dar uber haben wir die Egenant gult mit des vorgenanten Fridreichs des pechen und mit aller seiner Erben guetem willen und gunst verchauft ze Einem ewigen puerchrecht – umb zehen phunt wiener phening der wir gar und gentzleichen gewert sein. dem Erbern manne hern Perchtolten dem Pollen und vrouen Margreten seiner hausvrouen und iren Erbn. furbaz ledichleichen und vreyleichen ze haben und allen ieren frumen do mit ze schaffen verchauffen versetzen geben swem si wellen an allen ierresal. wir sein auch unverschaidenleichen mit sampt unsern erben der Egenanten gult ier recht gewer und scherm fuer alle ansprach als purchrechts recht ist. und der stat recht ze wienne Get in furbaz dar an icht abe mit recht. daz schullen si haben unverschaidenleichn auf uns und auf allem dem guet daz wier haben in dem lande ze osterreich wir sein lembtig oder tode. und daz diser chauf furbaz also stet sei. dar uber geben wier in disen brief versigelt mit unserm insigel. und mit unsers Egenanten Gruntherren insigel hern Rugers des wenigen Leupots sun der diser sache gezeuge ist mit seinem insigel und ander erber leut genuech. Diser brief ist geben ze wienne nach Christs geburde dreutzehn hundert iar dar nach in dem acht und dreizzigistem iar des samztags in der osterwochen.

Source Fulltext: Peter Peusquens