Ich Nichlas der Wittige. purger ze wienne und ich Elzbet sein hausvrowe. Wir vergehen und tuen chunt allen den die disen brief lesent oder hoerent lesen die nu lebent und hernach chuenftich sint. daz wir mit unser erben gueten willen und gunst mit verdachtem muet und mit gesampter hant zue der zeit do wir iz wol getuen mochten. und mit unsers Perchherren hant. dez erbern gaestleichen herren. apt Chunrades von Paeuern. verchauft haben Einen Weingarten der da leit ze Waerich in dem Gotshausperige dez dreu viertail sint. da man alle iar von dient achthalb viertail weins ze perchrecht. und zwen phenninge und ein Ort ze voitreht und nicht mer. und leit ze naehst vron Chunigunden weingarten von Hof. den vorgenanten weingarten haben wir recht und redleich verchauft und geben mit allem dem nutz und recht alz wir in jn perchrechtes gewer her praht haben. umb achtzich phunt wienner phenninge. der wir recht und redleich gewert sein. dem erbern manne hern Seifriden dem Minnganch purger ze wienne und seiner hausvrowen vron Lutzein und irn erben fuerbaz ledichleichen und vreileichen ze haben und allen irn frumen da mit ze schaffen verchauffen versetzen und geben swem si wellen an allen irresal. und dar ueber durch pezzer sicherhait so setzen wir uns ich vorgenanter Nichlas der Wittige und ich Elzbet sein hausvrowe. und unser erben unverschaidenleich ueber den vorgesprochen weingarten. dem egenanten hern Seyfriden dem Minnganch und seiner haus-vrowen vron Lutzein und irn erben. zu rechtem gewer und scherm fuer alle ansprach alz perchrechtes recht ist und dez Landes recht ze Oesterreich. Waer aber daz si mit recht an dem selben weingarten dehainen chriege oder ansprach gewunnen waz si dez schaden nement daz suln wir in alles aus richten und wider chern an alle ir mue und an allen irn schaden. Und suln auch si daz haben auf uns. und auf allem unserm guet daz wir haben in dem Lande ze Oesterreich wir sein lebentich oder toder Und daz diser chauf fuerbaz also staet und unzerbrochen beleibe. dar umb so geben wir in disen brief zu einem warn urchuende und zu einer ewigen vestnunge diser sache versigilt mit unserm Insigil. und mit unsers perchherren Insigil. der vorgenanten apt Chunrats von Paeuren. und mit unsers aidems Insigil Nichlas dez Jann. die diser sache gezeuge sint mit irn Insigiln. Diser brief ist geben ze wienne nach Christes gepurt dreuzehen hundert iar dar nach in dem acht und dreizgisten iar an sant Philips und sant Jacobs Tage.

Source Fulltext: Peter Peusquens