Ich Hainreich der Macholhart. und ich Elsepeth sein Tochter. und ich Bernhart der Swertzel sein aidem. und Margret sein hausvrowe. Wir veriehen und Tun chunt allen den die disen prief lesent oder horent lesen. die nu lebent und hernach chunftig sint. daz wir mit guetem willen und gunst aller unser Erben. Mit verdachtem muet. und mit gesampter hant. nach unser pesten vreunt Rat. zu der zeit do wir ez wol getun mochten und auch mit des Erbern Mannes hant hern Benedicte der Schotten amman ze Wienne. Recht und redleihen verchauft haben. unsers Rechten aner-storben Purchrechts. ein halb phunt phenning geltes. daz do leit auff Petreins haus des Pintter in der Cherner strazze gegen dem spital Chelre uber. zenaechst Heuglein dem Pintter. da von man dient alle jar. den herren von den Schotten ze Gruntrecht. drei wienner phenninge Mit alle dem Nutz und recht als wir ez unversprochenlichen in Purchrechtes gewer her pracht haben. umb vier phunt phenninge Wienner Muntz. der wir gar und gantz verricht und gewert sein. dem Erbern Manne hern Otten dem Chramer. und vron Margreten seiner hausvrowen. und ir paider erben. furbaz ledichleihen und vreileihen ze haben und allen iren frumen do mit zeschaffen verchauffen versetzen und geben swem si wellen an allen irresal. so beschaidenleihen. daz in der vorgenant Peter der Pinter. oder swer daz selbe haus nach im besitzte. daz vorgenant Purchrecht furbaz alle iar. da von dienen schulle. ze drin zeiten in dem iar. an sand Michels Tage ze Weynachten und an sand Georgen tag ze einem igleihen tage Viertzig phenninge unverzogenleihen in allem dem rechten als man ander Purchrecht dient in der stat ze Wienne. und verzeichen uns furbaz allez rechtes dar an. gentzleihen und durch pezzer sicherhait so setze wir uns unverschaidenleihen mit sampt unsern Erben. dem Egenanten Otten dem Chramaer. und vron Margreten seiner haus-vrowen. und ier paider Erben. uber daz vorgenant halb phunt geltes. ze rechtem scherm und gewer fur alle ansprache. als Purchrechtes recht ist. und der stat recht ze Wienne. Und waz in furbaz dar an abget daz schullen seu haben unverscheidenlihen. auff uns und auff allem unserm gut. daz wir haben. Und wand wir selber aygner insigel nicht enhaben. dor uber so geben wir in disen Prief ze einem offen urchunde. und ze einer ewigen vestenunge. versigelten. mit des vorgenanten hern Benedicten. insigel der Schotten Amman ze Wienne. der diser sache gezeug ist Mit seinem insigel. Diser Prief ist geben ze Wienne Nach Christes gepurt. dreutzehen hundert jar. darnach in dem Acht und dreizzigisten jar an sand Phylippes und sand Jacobes Tage. zwaier zwelfpoten.

Source Fulltext: Peter Peusquens