Ich Anne hern Marcharts witibe des Janes, dem Got gnade. vergich und Tun chunt. allen den die disen brief lesent. oder horent lesen. die nu lebent. und hernach chunftig sint. daz mir und meinem Chinde. ayn Paumgaertel worden ist. von meinem wirte dem egenanten Marcharten. daz da leit. zenaehste. des erbern herren paumgarten. hern Hermannes. zu den zeiten Canceler und Oberister schreiber. des Hochgeporen fuersten. Herzog Otten in Oesterrich. und daz rechtes purchrecht ist. von dem erwirdigen herren. dem Apte von den schotten zu wienne. dem man dient. alle iar. ze Grunthrecht. auf sand Mychahels tage sechs wienner phenninge. und nicht mer. Daz selbe vorgenante Paumgaertel han ich. Nach meines Vater rat. hern Hainrichs des Langen mit gueten willen. und gunst. alle meiner Erben. mit verdachtem muete, zu der zeit. da ich ez wol getuen mochte. und auch mit hern Benedicten hant. der Schotten Amman ze wienne. Recht und redlichen verchauft. und geben. Mit allem dem Nutze und Rechte als ich ez Nach meines wirtes Tode. unversprochenlichen. in Purchrechtes gewer herpracht han. umb zwaintzzich phunt wienner phenninge, der ich gar und gantz verricht. und gewert pin. dem Egenanten hern Hermanne, dem Canceler. und seinen naehsten Erben furbaz Ledichlichen. und vreilichen zehaben. und allen seinen fruemen da mit zeschaffen, verchauffen versetzen und geben swem Er wil, als im daz wol chom und fuege. an allen irresal. Ich han auch mit den selben phenningen ainen andern Paumgarten gechauft an des Paum-gaertelins stat. der weiln und e. der Engelprechtinne gewesen ist. zenaehest dem Paumgarten, der mir auch von meinem wirte, hern Marcharten dem Jane worden ist. den ich meinem Chinde, da mit wider leget han, als pillich und recht ist. und pin auch ich des selben Paumgertelins, hern Hermannes des Chantzeler, Rechter scherm und gewer. fuer alle ansprache. als Purchrechtes recht ist. und des Landes recht ze Oesterrich, und der stat recht ze wienne. Und daz der chauf und dise Rede furbaz also stete sei. dar uber so gebe ich im disen brief ze ainem offen urchunde. und ze ainer Ewigen vestenunge versigelten mit meinem insigel. und mit des vorgenanten hern Benedicten insigel, der schotten Amman ze wienne und mit meines Vater insigel. hern Hainrich des Langen. und mit. hern Hainrichs insigel. des Schuheler. zu den zeiten Muntzmaister ze wienne. die diser sache gezeuge sint. mit irn insigeln. und ander erber Leute genuch. Diser prief ist geben ze wienn Nach Christes gepuert dreutzehen hundert jar. darnach in dem Acht und dreizzigisten jar. an sand Pangraetzen Tage.

Source Fulltext: Peter Peusquens