Ich Ulreich auf Tunawe Purger ze Regenspurch und ich Elsepeth sein hausvrowe. Wir veriehen und tun chunt. allen den die disen lesent. oder horent lesen die nu lebent und hernach chunftig sint. daz wir mit unser Erben guten willen und gunst. mit verdachtem mute und mit gesampter hant. Nach unser pesten vrewnde Rat. zu der zeit. da wir ez wol getun mochten. und auch mit unsers Percherren Hant. des Erbern Gaistlichen Mannes Pruder Ulreichs von Zyrberch, zu den zeiten Haus Comentewer datz dem Deutschenhause ze wienne Recht und Redelichen verchauft haben unsers ledigen Chaufgutes ainen weingarten, der da leit ze nidern suffringen und haizzet der Heuzze. zenaehste der Deutschen Herren weingarten, des ain jeuch ist. da von Man dient alle jar, ze Rechtem Perchrecht in dem Lesen zwen und zwaintzzich wienner phenninge und nicht mer. Den selben vorgenanten weingarten haben wir verchauft und geben. Mit allem dem Nutze und Rechte als wir den unversprochenlichen in Perchrechtes gewer her pracht haben. umb virtzich March silbers wienner gewichtes ie zwen und sybentzzich grozze pehemi-scher phenninge fur ain iglich March, der wir gar und gantz verricht und gewert sein. dem Erbern Manne hern Haunolten dem Schuheler Purger ze wienne und vron Christein seiner hausvrowen und ir paider Erben, furbaz ledichlichen und vreilichen ze haben und allen iren frumen da mit ze schaffen verchaffen versetzen und geben swem seu wellen. als in daz wol chom und fuge an allen irresal. Und durch pezzer sicherhait, so setze wir uns ich vorgenanter Ulreich auf Tunawe und ich Elsepeth, sein hausvrowe unverschaidenlichen mit sampt unsern Erben. dem Egenanten hern Haunolten dem Schuheler und vron Christein seiner hausvrowen und irn Erben uber den vorgenanten weingarten ze Rechtem gewern und scherm fur alle ansprache. als perchrechts Recht ist und des Landes Recht ze Osterreich. Und swaz in furbaz dar an abe get. daz schullen seu haben unverschaidenlichen auf uns und auf allem unserm Gut, daz wir haben ze Payren oder wo wir ez haben wir sein lebentich oder Tode. Und daz der Chauf und dise Rede furbaz also stete sei. dar uber so geben wir in disen brief ze einem offen urchunde und ze einer Ewigen vestenunge versigelten. mit unserm insigel und mit des Haus insigel von dem Deutschenhaus ze wienne an des Egenanten Percherren stat, pruder Ulreichs von Zyrberch, und mit hern Chunrats insigel des Seylniker. Mein vorgenanten Elsepethen Ohaym und mit des Erbern Mannes insigel hern Hainreichs des Langen, purger ze wienne, die diser sache gezeuge sint mit irn insigeln. Diser brief ist geben ze wienne Nach Christes gepurt. dreutzehenhundert jar. darnach in dem acht und dreizzigisten jar. an sand Veyts Tage. Daz ist der prief uber den weingarten ze sufrin...

Source Fulltext: Peter Peusquens