Ich Wilhalm hern Wilhalms sun in dem Strahof dem got gnade und ander mein geswistrer. wir veriehn offenleichn an disem brief. daz wier unverschaidenleichn gelten schullen unserm geswein Chunraten dem wiltwercher und seinen Erben Achtzich phunt wienner phening. der er unserm vater und unser mueter bey iren lembtigen zeiten vier und viertzich phunt berait gelihen hat des er noch unsern brief inne hat und umb die andern sechs und dreizzich phunt hat er uns unsern paungarten mit sampt dem hause. der da leit in der Nydern Awe gelost von Petrein dem vogelein purger zu augspuerch und fuer daz selbe guet haben wier im gesatzt mit guetem willen und gunst und nach unser pesten freunt Rat und auch mit unsers Gruntherren hant bruder Nyclas zu den zeiten Cometewr ze sande Johans in der Chernerstrazzen ze wienne. den vorgenanten paungarten mit dem haus und alles daz dar zue gehoert da von man alle iar dint vier und viertzich phening ze Gruntrecht und nicht mer. Also daz er und sein erben den Egenanten garten und daz haus mit alle deu und dar zu gehort schol inne haben mit allem dem Nutz und recht als wier in Emalen habn inne gehabt. und sein auch wier ich Egenanter Wilhalm und ander mein geswistrer des garten und des haus mit alle deu und dar zue gehort sein und seiner erben recht gewer und scherm fuer Alle ansprach und chrieg nach des landes recht in Osterreich und der stat recht ze wienne und wand wier selber nicht aygenr insigel enhaben. so verpinten wir uns mit unsern treun alles daz stet ze haben daz an disem brief stet. under unsers vorgenanten Gruntherren insigel bruder Nyclas Comentewr ze sande Johans. und under der erbern leut insigeln hern Hermans des Snetzleins hern Herborts auf der Seule hern Hermans der Rudolfinne enenchel von sande Polten die alle diser sache gezeuge sint mit iren insigeln. Diser brief ist geben ze wienne Nach Christs geburde dreutzehn hundert iar. dar nach in dem acht und dreizzigistem iar an sande Veyts Tage.

Source Fulltext: Peter Peusquens