Ich Nyclas von Medlich hern Chahochs aydem. und ich Alheit sein Hausvrowe wir veriehn und tuen chunt allen allen den die disen brief lesent oder horent lesen die nu lebnt und her nach chunftig sint. daz wir mit unser Erbn guetem willen und gunst mit verdachtem muet und mit gesampter hant zu der zeit do wier ez wol getuen mochten, und mit unser Gruntvrowen hant und mit unsers Percherren hant. vrouen Agnesen der Gundramstorfferinne. und hern Jansen von Mansverde zu den zeiten der Hertzogen chelrmaister in Osterreich Recht und redleichn verchauft haben unsern weingarten der da leit ze Medlich an dem wartperge ze nehst Stephans weingarten des Stuchsen. da von man alle iar dient der Egenanten vrouen Agnesen der Gundramstorferinne vier und zwaintzich phennig ze Gruntrecht und nicht mer. Den selben weingarten haben wier verchauft und gebn mit allem dem Nutz und recht als wier in unversprochenleichn in perch-rechtes gewer her bracht habn, umb dreu und dreizzich phunt wienner phennig der wir gar und gentzleichn gewert sein. dem erbern manne hern Wilhalm in dem Strahof purger ze wienne und vrouen Katrein seiner hausvrouen. und iren Erbn furbaz ledichleichn und vreyleichn ze habn und allen iren frumen do mit ze schaffen verchauffen versetzen gebn swem si wellen an allen ierresal. Wir sein auch unverschaidenleichn mit sampt unsern Erbn des Egenanten weingarten ier recht gewer und scherm fuer alleu ansprach als perchrechts recht ist und des landes recht in Osterreich. Get in furbaz dar an icht abe mit recht, oder ob in dehain chrig dar auf enstunde. den selben chrig schulle wier in auzrichten an allen iren schaden. und schullen si daz habn auf uns und auf allem dem guet daz wier habn in dem lande ze Osterreich wier sein lembtig oder tode. Daz diser chauf furbaz also stet sei und unzebrochn beleibe. und wand unser Egenanteu Gruntvrowe nicht aygens insigels enhat. dar uber gebn wier in disen brief versigelt mit unserm insigel und mit unser Egenanten Gruntvroun sun insigel hern Chunrats des Gundramstorfer. und mit unsers percherren insigel hern Jansen von Mansworde. und mit des erbern herren insigel hern Fridreichs des Heuzzen die alle diser sache gezeuge sint mit irn insigeln und ander erber leut genuech. Diser brief ist gebn ze wienne Nach Christs geburde dreutzehen hundert iar dar nach in dem acht und dreizzigistem iar an sande Veyts tage.

Source Fulltext: Peter Peusquens