Ich Chuonrat Chiembsseer und ich Hainreich Frankch baid dietzeit des Rates der Stat ze Wienn Bekennen das wir von geschefft und haissens wegen des vorgenanten Rates Raittung haben aufgenomen von Hawnolten dem Schuechler burger ze Wienn in gegenburtigkait der erbern weisen Hannsen des Scharffenperger dietzeit auch des Rats der vorgenanten Stat und Stephans des Pôllen burger daselbs, alles das Innemen und ausgeben, So er von allen den guetern so demselben Hawnolten und seinen pruedern Petern und Jorgen Ir vater auch weilent her Hawnolt Schuechler in geleichen tail geschafft hat angenomen und ausgeben hat, und haben in derselben Raittung nicht anders verstanden denn das er seinen pruedern pruederleich und frewntleich hat mit gevaren, das Im ze dankchen ist, und ist man Im noch er den andern seinen pruedern nichts schuldig worden und also komen wir wider fuer den Rate und sagten da unser kuntschafft als wir ze Recht solten, und des zu urkund geben wir von geschefft und haissens wegen des vorgenanten Rats dem vorgenanten Hawnolten dem Schuchler den brief besigelten mit mein obgenanten Hainreichs Frankchen anhangundem Insigel und wann ich vorgenanter Chuonrat Chiembsseer selber nicht aigen Insigel habe, So hab ich vleizzichleich gepeten den erbern Man Niclasen den Zingken dietzeit auch des Rates der egenanten Stat, das er sein Insigel an meiner stat Im an schaden an den brief hat gehanngen Der geben ist ze Wienn an freitag nach sand Dorothen tag Nach Kristi gepurd viertzehenhundert und in dem Ains und Zwaintzigisten Jare.

Source Fulltext: Peter Peusquens