Ich Bruder Sigmund Lanntconmentewr Dewtschenherren ordens in Osterreich und ich Brueder Fridreich hawsconmentewr Deutschordens des hauses ze Wienn, und wir die Bruoderschafft gemain daselbs vergehen fur uns und all unser nachkomen und tun kund offenleich mit dem brief allen lewten yetz lembtigen und hernach kunftigen das wir mit gutem willen mit wolbedachtem muot und veraintem Rat zu der zeit do wir das mit Recht wolgetun mochten. Und mit gunst und willen des hochgeborn Fursten Hertzog Albrechts Hertzogen ze Oesterreich etc. unsers genêdigen herren und von merkchleicher unser notdurfft und geltschuld wegen darin das vorgenant unser haus komen ist und an derselben geltschuld man die hernach geschriben Summ gelts petzalt hat Recht und Redleich verchaufft haben unsern weingarten gelegen ze Grintzing oberthalb des Tuern des drew viertail sind genant die Pewnt zenachst Wilhalms Hamburg des Kollner weingarten an ainer seytten und an der andern zunachst Ulreichs des Sneyder burger ze Wienn weingarten von dem vorgenanten unserm weingarten man jêrleichen dient uns und unsern nachkomen zu dem vorgenanten unsern haus ze wienn sechsthalben wienner phenning ze Perkchrecht und dem pharrêr hintz der Heiligen Stat drew viertail weins ze ubertzins an sand Michels tag und nicht mer. Den vorgenanten unsern weingarten mitsambt seiner zugehorung haben wir mit allen den eren nutzen und Rechten als wir den unversprochenleich in Perkchrechts gewer Innegehabt und herbracht haben und damit er von alter herchomen verchaufft und geben umb hundert und fuenf phunt alles wienner phenning der wir gantz und gar verricht und gewert sein dem erbern Ulreichen dem Schraten burger ze wienn frawn Margrethen seiner hausfrawn und allen irn erben furbas ledichleich und freylich zehaben und allen irn frumen damit ze schaffen verkauffen versetzen schaffen geben und machen wem Sy wellent und alles damit hanndeln und tuen das in am aller pessten fuegt und wolgevellt an unser unser nachkomen und mênichleichs von unsern wegen Irrung und hindernuzz ungevêrleich. Und sein auch wir obgenant ich Bruder Sigmund Ramung LanntConmentewr und ich Bruoder Fridreich hausconmentewr mitsambt allen unsern nachkommen des vorgenanten weingartens mit seiner zugehorung des egenanten Ulreichs des Schrats frawn Margrethen seiner hausfrawn und allen irer erben Rechte gewern und Scherm fur alle ansprach als kauffs perkchrechts und des lanndes zu Osterreich recht ist Gieng in mit recht daran icht ab oder stund in icht krieg oder ansprach daran auf mit Recht von wem das wêr was Sy des schaden nement denselben schaden sullen und wellen wir In gentzleich ausrichten und widercheren an allen irn schaden und sullen Sy das haben datz uns unsern nachkomen und dem vorgenanten unserm haus und aus allem unserm guot das da zu dem obgenanten unserm haus gehort ez sey erbguot oder varundguot wie das genant oder wo das gelegen ist das wir dann haben in dem lannd ze Oesterreich und das der chauf furbas also stêt und untzebrechen beleib des zu ainem warn offenn urchund geben wir fur uns und all unser nachkomen dem obgenanten Ulreichen dem Schraten frawn Margrethen seiner hausfrawn und allen iren erben den brief versigelten mit mein obgenantes Bruder Sigmunds des Ramung lanntconmentewr Anhangundem ampt Insigl und mit des obgenanten hauses datz dem deutschen haus auch Anhangundem Insigl Geben ze Wienn an Samtztag vor Oculi in der Vassten Nach Kristi gepurd viertzehenhundert und in dem Ains und zwaintzgisten jare.

Source Fulltext: Peter Peusquens