Wir Albrecht von gotes gnaden Hertzog ze Oesterreich ze Steyr ze Kernden und ze Krain Grave ze Tyrol etc. Bekennen und tuen kund offenleich mit dem brieve, daz wir unserm lieben getrewn Hannsen von Puechaim durch seiner fleissigen dienst willen, die er uns enther getan hat und noch hinfuer tuen sol und mag und auch von sunder gnaden gegeben haben und geben auch wissent-leich mit dem brief das haws ze Wienn in der Judengassen gelegen, das Eschleins des Juden von Drêskirchen ist gewesen, mitsambt ainem zuhaws daselbs, genant das Czieglhaws, das mit ainem ort an den Hof und mit dem andern an Unserfrawnbrueder freithof stoesset, das Adams des Juden von Lewbs gewesen ist, und auch ainen Stokhbrunn und gemewr zenachst an des benanten Eschleins des Juden haws gelegen, und das alles von den benanten Juden an uns koemen ist. In solicher masse daz derselb von Puechaim und sein Erben die vorgenanten hewser und Stokhbrunn mit Iren zuegehoerungen nue fuerbaser innhaben nutzen und niessen suellen und muegen und Iren frumen damit schaffen nach Iren notduerften wie In das am besten fueget. Mit urkunt ditz briefs. Geben ze Wienn an Sant Oswalds tag. Nach Kristi gebuerde viertzehenhundert jar und darnach in dem Ainenundzwaintzigisten jare.

Source Fulltext: Peter Peusquens