Ich Hanns Dristl von Purchartstorf. Vergich fuer mich und all mein erben und tun kunt offenleich mit dem brief umb die zwaintzig phunt phenning So weilent Elsbethen Kuenrats des koler hausfraw ze haimstewr gegeben und auf desselben Kunrats choler haus gelegen ze wienn in der Strauchgassen verschriben sind gewesen und die mein Steuftochter Margreth die Tannêrinn ze Purkchartstorf und Ann Michels des fleischhakcher von Weydungsaw hausfraw und meine kinder Wolfgang und Dorothe der obgenanten Elzbeten kolerinnn geswistreid geerbt habent und wan mir an stat meiner kinder und den vorgenanten meinen zwain Steuftoechtern dieselben zwaintzig phunt phenning, die Ersamen weysen..der Purgermaister und der Rate der Stat ze Wienn gegeben und Ingeantwuertt habent. Darumb hab ich mit wolbedachtem muet zu der zeit da ich es wol getun mochtt, und mit handen des erbern weisen Petern des Rokkendorffer dietzeit vorstmaister in Oesterreich den vorgenanten herren .. dem Purgermaister und dem Rate und iren Nachkomen der Stat ze Wienn fuer die vorgenanten zwaintzig phunt phenning zu Rechtem Ebentewr und scherm gesatzt mein haus gelegen ze Purkchartstorf zenegst der vest mit aller seiner zuge-hoerung. In der maynung ob in Rechten têgen icht als nahent oder nêhenter erben herfuer komen die das vorgenant gelt geerben mochten das den ir Erbtail gevall angevêrd. Mit urkunt des briefs Besigelt mit des vorgenanten Petern des Rokkendorffer aufgedrukchtem Insigel der geben ist ze Wienn an Mitichen vor sant Bêrtlmees tag Nach Kristi gepurd viertzehenhundert und in dem ains und zwaintzkistem Jare

Source Fulltext: Peter Peusquens