Wir Albrecht von gotes gnaden hertzog ze Oesterreich, ze Steyr, ze Kêrnden, und ze Krain, Grave ze Tyrol etc. Bekennen, daz wir der erbern Wilburgen, weilent Eberharts von Kappellen tochter, unsers lieben getrewn Joergens von Dachsperg hausfrawn, von sundern gnaden gegeben haben, und geben auch wissentleich mit dem brief, die hernach genanten drew hêwser. Von erst ain haws, das ettwenn Rêchlinn der Jüdinn gewesen ist, und stosset an des Grunpecken haws, gelegen hie ze Wienn, bey unsrer frawen auf der Steten, Item darnach ain haus gelegen daselbs in der Judengassen, das Smerl des Wênckel gewesen ist, und ain haus auch gelegen daselbs in der Judengassen das Hendlinn der Jüdin von Lempach ist gewesen, und von den egenanten Juden, und Jüdinnen an uns koemen sind. In solhermass, daz Sy und Ir erben, die, mit allen Irn zugehoerungen, fuerbasser ledichleichen und freyleichen haben und allen Irn frumen damit, und darInn, schaffen sullen, und muegen, wie In das am pesten fueget, oder wolgevellet an mênichleichs Irrung und hindernuess ungevêrleich. Mit urkund ditz briefs. Geben ze Wienn an Mittichen nach sand Kathrein tag Nach Kristi gepuerd viertzehenhundert Jar, darnach in dem Ainen und zwaintzigisten Jare. d. d(ux) p(er) L(eupoldum) de Echk(arczsau).

Source Fulltext: Peter Peusquens; siehe auch: • Schlager, Wiener Skizzen 1, 69 n° 17.