Wir Albrecht von gotes gnaden Hertzog ze Oesterreich, ze Steyr, ze Kêrnden, und ze Krain, Grave ze Tyrol etc. Bekennen, daz wir der erbern Lucein, Joergen des Pruntaler hausfrawn gegunnet haben, und gunnen auch wissentleich mit dem brieve, daz Si ir, und ir kinder haus, die Si bey irem Eeren wirtt gehabt hat, gelegen hie ze Wienn am Kolmarkt an ainer seytten zwischen des Grunn Jacoben haus, und an der andern zwischen Ulreichs des kochs haus, von unserm getrewn Oswalten dem Ingelsteter unserm harnaschmaister geloesen, und das andern leuten umb dieselben Summ, darumb es geloeset wirt, zu disem mal versetzen mag. Mit urkunt ditz brieves. Geben zu Wienn an freitag vor Judica in der Vasten. Anno domini Millesimo Quadringentesimo Vicesimo tercio. d. d(ux) in cons(ilio).

Source Fulltext: Peter Peusquens