Albrecht von gotes gnaden Hertzog ze Oesterreich und Markgraf zu Mêrhern etc. Erbern weisen und lieben getrewn. Als ir yetz unser getrewn lieben, Hannsen den Scharffen-berger, Burgermaister ze Wienn, und Hannsen den Stegêr, ewrn mitburgêr daselbs, zu uns gesandt, und uns ewr gebrechen bey In zu erchennen geben habt, das haben wir wol vernomen, und lassen ew wissen, daz wir daran beliben sein, daz der egenante Burgermaister, und auch der Richtêr, daheim beleiben, und in ewrm abwesen, der Stat notduerfft ausrichten sullen. Und daz sich sust yederman, auz ew, dartzue schikhe, und anvertziehen gen Laa ziehe, als ew des die egenanten..der Burgermaister, und Hanns der Steger, aigenleich werden underweisen. Und was ew die nuzemal von unsern wegen sagen werdent, das gelaubet In gêntzleich als uns selber. Geben auf dem Grewtzenstain, an Eritag nach Sant Elzbeten tag. Anno domini etc. vicesimo quinto. d(ominus) d(ux) in cons(ilio)

Source Fulltext: Peter Peusquens