Ich Ulreich Junger dietzeit Kormaister, und wir die Curherren gemain Allerheiligen Tumbkirichen datz sand Stephan ze Wienn. Bekennen fur uns und all unser Nachkomen, und tun kund offenleich mit dem brief Allen den er furkumbt und getzaigt wirdet. Als weilent der Erber Man Ott Weiss seliger das Gotzhaus zu den Schotten hie zu Wienn merkchleich begabt hat mit ettwevil weinwachs gelegen in der Mawr und zu Praitensee. Darumb sich dann dieselben geistleichen herren des egenanten Gotzhauss gegen uns, und unsern Nachkomen verpunden habent uns ewigkleich und jerleich zu diennen drithalb phund wienner phening. Also das wir derselben dritthalb phunt phening jerleichen haben sullen zwelf schilling umb ain ewigen jartag den wir dem obgenanten Otten Weissen Dorothen seiner hausfrawen und allen gelaubigen selen jerleichen an sand Andres tag oder in den nagsten Achttagen darnach an welhem tag sich das gefuegen mag begen sullen, und das ubrig phunt phening sullen wir haben darumb das wir des egenanten Otten frawn Dorothen seiner hausfrawn und Ir baider vorvordern selen gedechtnuss haben sullen in unsern Toten Zedeln, und zu allen predigen, so wir bey der egenanten kirichen tun darumb offenleich pitten als das der brief nemleich ausweist den wir von den egenanten geistleichen herren haben davon so geloben, und verbinden wir uns, und all unser Nachkomen gegen des egenanten Otten des Weissen geschefftleuten und gegen allen den die den brief Innhabent das wir alle jar jerleichen den vorgenanten jartag zu dem egenanten tag ausrichten und begen sullen und wellen des nachts mit ainer gesungen Vigily des morgens mit ainem gesungen Selambt und mit vier und zwaintzig priminden stekchkertzen als dann solher jartêg bey der egenanten Tumbkirchen ze begen sit und gewonhait ist ordenleich an all sawmnung, und auch in allen predigen und Totenzedeln umb des egenanten Otten des Weissen Dorothen seiner hausfrawn und aller Irer vorvordern und nachkomen selen piten auch an alle underlos ungevêrleich. Wêr aber das wir an dem jartag oder an der kunndung Inndert wissentleich sawmig erfunden wurden an behafte not so sullen wir alsofft zu pen vervallen sein zugeben ainem yeden kirichmaister drew phund wachs, und dennoch dartzu alles das widerpringen und ausrichten das wir versawmbt hieten an alle widerred, und auszug getrewleich und ungeverleich. Mit urkund des briefs besigelt mit der egenanten Cur anhangundem Insigel. Geben ze Wienn an Mitichen nach sand Ulreichs tag. Nach Kristi gepurd viertzehenhundert jar darnach in dem dreyssigistem jare.

Source Fulltext: Peter Peusquens