Ich Wolfgang Floyt Vergich fur mich und all mein erben und tun kund offenlich mit dem brief, das Ich mit gutem willen und wolbedachtem muet zu der zeit do Ich es wol getun mocht, und mit hannden der Ersamen weisen hern Conrats des Holtzler zu den zeiten Burgermaister und des Rats gemain der Stat ze Wienn Recht und redleich verkaufft hab mein haus gelegen bey Kernertor ze Wienn gegen der Rinkchmaur ueber zenagst Cristoffen des Dechsenpekchen haus mit allen den nutzen und Rechten als das von alter unversprochenlich in purkchrechts gewer herkomen ist. Umb Sechtzig pfund wienner pfenning der Ich gantz verricht und gewert pin, dem edeln Jorgen Palterndorffer und seinen erben, furbaser das egenant haus ledikleich und freyleich zehaben und allen Iren frumen damit zeschaffen verkauffen versetzen schaffen machen und geben wem Sy wellen an alle Irrung. Ich pin auch mitsambt allen meinen erben unverschaidenlich des vorge-nanten hauss des egenanten Palterndorffer und seiner erben Recht gewer und Scherm fur alle ansprach als purkrechts und der Stat ze Wienn Recht ist Wêr aber das In icht krieg oder ansprach daran auferstuenden von wem das wêr mit Recht was Sy des schaden nement das sullen wir In alles ausrichten und widerkern an allen Iren schaden Und sullen Sy das haben zu mir und meinen erben unverschaidenleich und auf allem unserm guet das wir haben in dem lannde ze Osterreich oder wo wir es haben wie das genant ist nichts ausgenomen wir sein lebentig oder tod Mit urkund des briefs besigilt mit meinem Anhangundem Insigil und mit der vorgenanten Stat ze Wienn Anhangundem GruntInsigil Der sach ist gezeug durch meiner vleissigen gepet willen, der edel Cristoff Dechsenpekch mit seinem Anhangundem Insigil Im und seinen erben an schaden. Geben ze Wienn an Mitichen nach Letare in der Vassten Nach Cristi gepuerd vierzehenhundert jar darnach in dem zwayunddreyssigistem jare.

Source Fulltext: Peter Peusquens