Heinrich von gots gnaden Pfallentzgrave bei Rein und Hertzoge In Beyren etc. Unsern gunstlichen grus zuvor Ersamen weise uns besunderlieb. Es ist Hanns Loerberarer unser zollner zu Lanndshuet von Lienharten Schermitzer, In des hochgeborn fursten unsers lieben swagers Hertzog Albrechten von Osterrich etc. lannde gefanngen worden, das wol an ew gelangt ist, als wir nit zweifeln. Nu haben wir dem egenanten unserm lieben swager vormals, auf solh wege geschriben. Als wir Im dann yetzo aber schreiben, das ir in diser ingeslossen Copien wol vernemen werdet, und Bitten ew mit besunderm guten vleiss Ir wellet darInn gehollfen und geraten sein und den egenanten unsern liben swager dann weisen, das er mit dem egenanten Schermitzer schaffen, und umb unsern willen ernstlichen darob sein welle, damit solhe rechtbote, von dem Schermitzer auf genoemen und der unser darauf ledig gelassen werde als ir selbs wol verstet, das er solhes billichen tuet, damit des egenanten unsers liben swagers und auch unser kauflewt, an Irrung zu ein ander gearbaitten muegen als dann bis here beschehen ist, daran beweiset ir uns besunder gut gevallnues und begern darInn ewr antwortt verschriben bei weisz dies brifs. Datum Lanndshuet an Viti Modesti. Anno domini etc. XXXIII°.

Source Fulltext: Peter Peusquens