Albrecht von gotes gnaden Hertzog ze Oesterreich und Markgraf ze Mêrhern etc. Getrewer Muenssmaister. Als unser getrewr Chuonrat der Huphauf yetz hievor bey uns ist gewesen von ains bestands wegen des Spieglêr haws wegen zu Wienn gelegen. Hat uns angelangt wie dir derselb Huphauf hab fuerbracht wie wir Im geantwurtt haben, daz die Sach angesteen sulle untz daz wir am nachsten gen Wienn komen, lassen wir dich wissen daz wir des also nicht ingedenkh sein, und ist auch unsers willen nye gewesen, sunder mainen wir, als wir Im dann datzemal selber haben geantwurtt daz unser getrewr maister Ekhart unser Goltsmid bey dem bestand desselben haws beleibe. Davon emphelhen wir dir ernstleich und wellen, daz du denselben maister Ekharten bey dem bestand desselben hawss von unsern wegen haltest und auch mit dem Huphauf ernstleich schaffest, daz er denselben maister Ekharten daran ungeirret lasse wan er willig ist, die Summ gelts von des obgenanten hawss wegen darzuleihen, die der Huphauf leihen solte. Das ist gêntz-leich unser maynung. Geben zu Alacht an freitag, vor Sant Stephans tag Invencionis. Anno domini etc. Tricesimo tercio. Under unserm Secret. d(ominus) d(ux) per Joh(annem) de Ror(bach), m(agistrum) curie.

Source Fulltext: Peter Peusquens