Ich Bruder Hanns Gruenwald diezeit prior datz den Predigern ze Wienn und wir das Convent gemain daselbs. Bekennen das uns die erber fraw Anna, Niclasen Raydel des pekchen hausfrau, die emaln Erharten Veyaln den pekchen seligen auch eleichen gehabt hat, ausgereicht und gegeben hat zehen pfund wienner pfenning die uns der benant Erhart Veyal seliger geschafft hat, nach laut seins gescheffts das in dem Statpuech ze Wienn geschriben stet und das wir solher guettêt und andacht so der benant Veyal zu uns und unserm gotshaus gehabt und getan hat, nicht undankchnêm sein. Davon so geloben und verpinnden wir uns fur uns und all unser Nachkomen wissentleich in kraft des briefs gegen der benanten fraun Annen und allen den die den gegen-wurtigen brief innhabent. Also das wir dem benanten Erharten Veyal jerleich des nagsten Suntags nach sand Polten tag ainen Jartag ausrichten und begeen sullen und wellen des abents mit ainer gesungner Vigiln und des morgens mit ainem gesungem Selambt und mit aufgestakten prininden kertzen darunder als dann unsers klosters sit und gewonhait ist, an alle widerred und sawmung ungeverleich Mit urkund des briefs besigilt mit unsern baiden Anhangunden Insigiln Geben ze Wienn an Montag nach unserer lieben fraun tag Assumpcionis. Nach Kristi gepurd viertzehen-hundert jar darnach in dem drewunddreissigistem jare.

Source Fulltext: Peter Peusquens