Ich Jacob, Ich Wulfing, Ich Anndre und Ich Ott geprueder und vetteren von Stubenberg, obrist Schênckhen In Steiren, wir vergechen fur uns und all unser erben, und tuen kund offenleich mit dem Brieff allen lêwtten gegenwuertigen und chuenfftigen, daz wir mit guetem willen und mit wolwedachtem muett ze der zeit do wier ez woll getuen moechten, und mit Handen der erbern weisen Kuenraten dez Holtzel ze den zeiten Buergermayster, und des Ratts Gemayn der Statt ze Wienn, Recht und Redleich verkawfft haben, unser hawss gelegen In der Pippinger Strass ze Wienn ze nagst dez pharrer von Palterndorff hawss mit allen den nuetzen und rechten als ez unver-sprochenleich von alter In purckhrechts gewêr herkoemen ist, umb dritthalb hundert phunt wienner phenning der Swartzen munsz, der wir gantz verricht und gewert sein, dem Edlen herren Hannsen von Kuenring unserm lyeben ohaym und allen sein erben fuerbaser ledickhleich und freyleich ze haben, und allen iren fruemen do mitt ze schaffen verkawffen versetzen Schaffen machen und geben wem Si wellent, und allez daz do mit tuen und handlen daz In am pesten fueget und wolgevellet vor aller yrrung ungefêrleich. Und zu pesserr sicherhayt So setzen wir uns mitsambt unseren erben unverschaydenleich uber daz egenant hawss In ze rechten geweren und schermen fuer alle ansprach als Purckhrechts, und Statt ze Wienn Recht ist. Wêr aber daz In icht krieg oder ansprach dar an aufferstuenden von wem daz wêr mit Recht, oder ob In mit Recht dar an icht abgieng, was Si des schaden nêmen daz schullen wir In allez widerkeren und schullen Si das haben zu uns und zu unseren erben unverschaydenleich, und auff allem unserm gutt daz wier haben In dem land ze Steir ze Oesterreich oder wo wier das haben wier sein lebentig oder tod. Und das der kauff also stêtt und untzebrochen weleibe, und dar uber zu aynem waren urkund geben wir In den Brieff besiglten mit unser obgenanten Jacoben, Wulfings, Andre und Otten geprueder und gevettern von Stubenberg aygen anhangunden Insiglen, und mit der vorgenanten Stat ze Wienn anhangunden GruntInsigel. Geben ze Wienn am phintztag nach unser lieben frauen tag der Schydung nach Kristi gepurd viertzehenhundert jar dar nach in dem dreyunddreyskigistem jare.

Source Fulltext: Peter Peusquens