Ich Hanns Swab Statrichtter ze Wienn Bekenn offenlich mit dem brief, das fur mich kom In der Burgerschrann da Ich sas daselbs an offem gericht, der erber Simon von Eslorn burger ze Wienn und klagt mit vorsprechen hintz Hannsen Koetzseer daselbs, umb drew phunt und sechsund-sechtzig wienner phenning, die er Im schuldig wer und gelten solt, alsverr untz das er Im nach allen furboten und zewissentun das egenant gelt alles mit rechten nottaidingen anerlangt und behabt vor mein und offem gericht und suecht auch darumb in seiner gwalt nach der Stat und Schrannrechten ze Wienn und wand nichts da ward gefragt was recht wêr, da geviel Im mit frag und urtail Wo er furbaser auf den egenanten Hannsen Kotzseer seinen gelter oder sein guet erb und varundguet Inner oder ausserlannde getzaigen oder komen mocht. Da solt man In mit dem wanndel alsverr zuenotten und solt dem egenanten Simon von Eslorn desselben seins guet sovil Inantwurten gewaltig machen und an die gewer setzen Soverr das er des egenanten seins gelts gantz davon verrichtt und gewert werde Und solt Ich Im des mein urkund geben, darumb solt er mir mein recht geben, das hat er getan. Des zu einer offen warn urkund gib Ich Im den brief besigilten mit meinem angehangem Insigil. Geben ze Wienn an freitag vor Reminiscere in der Vassten. Nach kristi geburd virzehenhundert und Im virunddreissigistem jare.

Source Fulltext: Peter Peusquens