Wir Niclas Brobst Wolfgang prior und der gantz Convent des Closters datz sand Dorothea ze Wienn Bekennen und tun kund offenlich mit dem brief fur uns und all unser nachkomen Als wir die Padstuben gelegen ze Wienn am Sweinmarkcht umb funfthalbhundert phunt phenning mit kauf und mit willen der erbern weisen des Burgermaistêrs und des Rats daselbs ze Wienn in unser gwalt bracht haben, als der kaufbrief daruber gegeben aigentleich ausweiset, daz wir gelobt haben und geloben auch wissentleich mit dem brief, daz wir und all unser Nachkomen fur die gewondlich Schatzstewr und Ansleg von der egenanten Padstuben alle jar der Stat ze Wienn ausrichten und geben sullen und wellen sechs phunt wienner phenning an alle widerred ungevêrleich. Und des ze urkund geben wir der Stat ze Wienn den brief versigilten mit des obgenanten unsers Closters, anhangundem Insigil. Geben ze Wienn an Eritag nach Judica in der Vasten. Nach kristi gepurd viertzehenhundert jar darnach in dem vierunddreissigistem jare.

Source Fulltext: Peter Peusquens