Wir Albrecht von gotes gnaden, Hertzog ze Oesterreich, ze Steir, ze Kêrnden, und ze Krain, Markgraf ze Mêrhern, und Grave ze Tyrol etc. Bekennen, daz uns unser getrewr, Hanns der Eytzinger, an seim offen versigelten brief hat aufgesandt, das haws zum Goetfrids, und achtzehn gueter, lehen, und hofstet, die darzue gehoerent. Item den wildpan, als weit die pharr zum Goetfrids geet, und das Gericht daselbs zum Goetfrids, in dem dorf, ausgenomen was den tod beruert, unserr lehenschaft, und bat uns diemueticleich, das zuverleihen unserm getrewn, Kuenraten dem Eytzinger, seinem vettern, wan er Im das zu kauffen geben hiett. Das haben wir getan, und haben dem yetzgenanten Kuenraten dem Eytzinger, das obgenant haws mitsambt den egenanten stukhen verlihen, und leihen auch wissentleich mit dem brief, was wir Im zu recht daran verleihen suellen, oder muegen. Also, daz er und sein erben, das nu fuerbazzer von uns, und unsern erben in lehensweis innhaben, nuetzen und niessen suellen, und muegen, als lehens und lands recht ist, ungevêrleich, Mit urkunt des briefs. Geben zu Wienn, an Phintztag, vor sant Philipps, und sant Jacobs tag, Nach Kristi gepuerde, viertzehenhundert Jar, und darnach in dem vierunddreyssigisten Jare. d(ominus) d(ux) per Geor(ium) Palterndorffer.

Source Fulltext: Peter Peusquens