Den erbern weisen..dem Burgermaister Richter und Rate der Stat ze Wienn. Embeut Ich Anna Purkcharts des Kienberger eleiche hausfraw, mein willig dienste bevor. Ich tun ew zu wissen, das Ich mitsambt meinen lieben vater und swestern, Joergen dem Stewdlein und Agnesen Mertten des Ranynger hausfrawn, und Regina Lewpolden des floetzer zu Closternewnburg hausfrawn unser haws gelegen in der vordern pekchenstrass zu Wienn das von ew Gruntrecht ist, verkaufft haben, dem erbern weisen Hannsen dem Zirenast, Burgêr zu wienn, Bitt Ich ewr weishait mit allem und sunderm vleisse, Ir wellet dem egenanten Zirenast, denselben kauf mit ewrm Sigil vertigen, als dann soelher vertigung, ewrer Stat Recht und gewonhait ist, das will Ich gern umb ewr weishait verdienn, wann das mein guter will und pet ist, und wil das nynndert widersprechen noch da-wider tun in dhainer weise ungeverleichen . Mit urkunt des briefs besigilt mit, der erbern weisen hern Petern des Strasser diezeit des Rats und kamrer der Stat zu Wienn und Gabrieln des Grêven-perger Burger daselbs baider aufgedrukten Insigiln, die Ich zugezeugnuess der sach mit vleiss darumb gepeten hab In und Irn erben an schaden Darunder Ich mich mit meinen trewn verpint, alles das stêtzuhaben sovor geschriben stet wann Ich selb nicht aigen Insigil enhab. Geben zu Wienn an sand Erasems tag des heiligen Marttrer anno domini etc. Tricesimoquinto.

Source Fulltext: Peter Peusquens