Erbern und weisen besunderlieben. Uns hat unser getrewr andêchtiger Meinhart Lochner unser Capplan furbracht. Wie das .. der Cantor zu sand Stephan zu Wienn mit ainer Gotsgab fuer-gesehen, damit die Cantorey daselbs ledig worden, darumb er werbund und anruffund sey. Biten wir ew mit vleiss Ir wellet ew den selben unsern getrewn, als er darumb an ew begerund ist oder sein wirdet, durich unsern willen guenstlich bevolhen lassen sein, damit er zu der vorberuerten Cantorey, fuer ainen andern aufgenomen und darzue genuetzt werde. Daz wellen wir gen ew erkennen. Geben zu Enntzestorffe an Montag vor sand Larentzen tage. Anno domini etc. Tricesimoquinto. Nicodem von gotes gnaden Bischof ze Freisingen.

Source Fulltext: Peter Peusquens