Albrecht von gotes gnaden Hertzog ze Oesterreich, und Markgraf ze Merhern etc. Erbern weisen und lieben getrewn. Als Ir uns yetz habt verschriben, von des aufsatz wegen, den die von Bayrn in Irm land umb die weinfur gemacht habent, das haben wir vernomen, und lassen ew wissen, daz wir nu an unserm erheben sein, und mainen uns fuerderleich gen Wienn zefuegen. Davon ist unser gevalnuss, wenn wir gen Wienn komen, daz Ir uns dann von der sachen wegen manung tut, So wellen wir ew unser maynung zuerkennen geben. Denn als Ir schreibt von des getraids wegen, den die geste kauffent, und aus dem land fuerent, verkuenden wir ew, daz wir das den gesten ditzmals nicht mainen zuverpieten, damit man uns nicht beschuldigen mueg, daz wir den anvang machen. Aber unsern undertanen wellen wir des nicht gestatten, und haben von stunden an unser Mautstet geschriben, daz man unser undertanen nicht lass getraid aus dem land fuern, wan so wir hinaus komen, So wellen wir ze rat werden, was verrer in den sachen zetuen sey. Geben ze Bruenn, an Mitichen nach unserer frawn tag Assumptionis. Anno etc. Tricesimo quinto. d. dux in cons(ilio).

Source Fulltext: Peter Peusquens