Ich Maister Michel Puff von Schrikch lerêr in der Ertzney Bekenn von wegen ains hawses gelegen Im Rawbergêsslein zu Wienn, als man zu sand Stephan geet, genant des Poschen haws zenagst der Burger Collegy, das Ich von Maister Sebolden von Ravenspurg auch lerer in der Ertzney, umb drew-hundert phund pfenning gekaufft hab, nach lautt ains kaufbriefs, den mir die Ersamen weisen herren..der Burgermaister und..der Rate der Stat ze Wienn mit Irem Grunt Insigil gevertigt ha-bent, davon so gelob und verpind Ich mich mit meinen trewn an alles gevêr, gegen den egenan-ten meinen herren..dem Burgermaister, und..dem Rate der Stat ze Wienn, daz Ich Stewr und all ander mitleidung, wann und wie offt sich die gebuerent, von dem egenanten haws geben und tun sol und wil, als ander Ir mitburgêr, und sol auch darInn der universitet freyhait, nicht genyessen in dhainer weise ungeverleich. Mit urkund des briefs besigilt mit der erbern Ulreichs Hirssawêr Statschreiber ze Wienn und Stephan des Awer burgêr daselbs anhangunden Insigilen, die Ich zu gezeugnuess der sach mit vleiss darumb gepeten hab In und Iren erben an schaden, darunder Ich mich mit meinen trewn verpinde stêtzuhaben sovorgeschriben stet. Geben zu Wienn an Montag vor sand Andres tag des heiligen zwelifpoten. Nach Cristi gepuerd viertzehenhundert jar darnach in dem fuenfunddreyssigistem jare.

Source Fulltext: Peter Peusquens