Wir Sigmund von gotes gnaden Romischer Keyser zuallenzeiten Merer des Reichs, und zu Ungern zu Behem Dalmatien Croatien etc. kunig Bekennen und tun kunt offembar mit disem brief allen den die In sehen oder hoeren lesen, daz wir guetlichen angesehen und betracht haben, soelich redlichkeit biderbkeit und vernuemfft, die unsere und des Reichs lieben getrueen, Hans Graendel Peter und Michel sin Bruder an In hant, und ouch getrue und gneme dienst, die Sy uns und dem Riche zutun willig und bereyt sind, und ouch getan hant, und fuerbaß tuen sollen, und moegen in kuemfftigen zeiten. Und haben dorumb mit wolbedachtem muete, guetem Rat unserer getruen, und rechter wissen, den vorgenanten Hansen Petern und Micheln und Iren eelichen erben, dise nachgeschriben wapen und Cleynat, die Sy gehabt und herbracht haben, Mit namen eyn wissen Schilt, mit eynem plawen Strich geende uber ort des Schiltes, und in yglichem teyle der wissen feldung eyn ygel, und uff dem Schilt ein helm mit einer plawen und wissen helmdecken geziret, doruff ein plawer geflochten zuen mit zwein weissen flueg doruff ouch mit dem plawen strich und ygeln, als in dem Schilt. Alsdann dieselben wapen in der mitte diß gegenwertigen unsers brieffs gemalet und mit varben eygentlicher ußgestrichen sind, gnediclich bestetigt confirmirt, und In die von ne // wes gegeben und verliehen, bestetigen confirmiren geben und verliehen In die von newes von Romischer key // serlicher macht in crafft diß brieffs, und setzen und wollen von derselben keyserlichen macht, das die vorgenanten Hans // Peter und Michel, und Ire eeliche erben, die vorgenanten wapen und Cleynat fuerbaßmer haben, die fueren, und der in // allen Ritterlichen sachen und geschefften zu Schimpff, und zu ernste, und an allen enden gebrauchen und genies // sen mogen, von allermenniclich ungehindert. Und wir gebieten dorumb allen vnd yglichen fuersten Geistlichen // und werntlichen Graven freyen herren edeln Rittern knechten amptluten herolden persevanten voyten Rich // tern Burgermeistern Reten und gemeinden aller und yglicher Stete merckte und dorffere, unsern und des heili // gen Romischen Reichs und unserer kunigrich zu ungern und zu Behem undertanen und getruen, von Romischer // keyser-licher macht, ernstlich und vesticlich mit disem brief, das Sy die vorgenanten Hansen Petern und Micheln, und // Ire eelichen erben, an den vorgenanten wapen und Cleynaten und unsern gnaden, nicht hindern oder Irren in dhein // weiß Sunder Sy der geruelich gebrauchen vnd geniessen lassen, als lieb In sey unser und des Reichs swere ungna // de zuvermeyden, unschedlich doch yderman die villicht der vorgenanten wapen gleich fuerten an Iren wapen und rech // ten, Mit urkund diß brieffs versigelt mit unserr keyserlichen Maiestat Insigel. Geben zu Ofen in ungern nach // Crists gebuert viertzehenhundert jar und dornach in dem Sechs und dryssigistem jare am donerstag nach sant Mathie des heiligen Czwelffboten tag Unserr Riche des ungrischen etc. im Newnundfiertzigistenmdes Romischen im Sechsundzweintzigisten des Behemischen im Sechtze-henden, und des keysertumbs im dritten jaren. Ad mandatum domini Imperatoris Marquardus Brisacher

Source Fulltext: Peter Peusquens