Albrecht von gotes gnaden, Hertzog ze Oesterreich und Markgraf ze Mêrhern etc. Erbêrn weisen, und lieben getrewn. Uns ist fruerbracht, wie weilent Wolfgang, der Hansgraf, unser Burger ze Wienn von soelher zwitrêcht wegen, darinn er gegen seiner muter ettwievil zeit gestanden ist, in merkleich geltschuld koemen sy, dadurch unser getrewr Niclas underm Hymel, unser Muenssmaister, dem derselb Hansgraf zuverwesen, von ew empholhen sey gewesen, sein haus in dem kamerhof, daselbs ze Wienn gelegen, zu betzaln soelch geltschuld, unserm getrewn, Andren dem Hylprant, auch unserm Burger ze Wienn, umb ain genante Summ gelts, der er dieweil derselb Hansgraf gelebt hab, betzalt sey, als wir vernemen verkaufft hab, dasselb haus Ir dem selben Hiltprant nicht wellet verttigen, darumb daz derselb Hansgraf, nu gestorben sey. Emphelhen wir ew, und wellen ernstleich, Seid der kauf, by des egenanten Hansgraven lebtêgen beschehen, und auch das gelt darumb das obgenant haus verkauft, und nu betzalt ist, daz Ir denn dasselb haus dem egenanten Hiltpranten verttigen, und In des darumb, in ewr Gruntpuech, nutz und gewer schreibet, als sitleich und gwondleich ist. Daran tuet Ir unsern willen. Geben zu Bruenn an sand Bêrtelmes tag. Anno etc. Tricesiomosexto. d(ux) per m(agistrum) h(ubarum).

Source Fulltext: Peter Peusquens