Ich Stephan Wirsing dietzeit Statrichter zu Wienn. Bekenn offenlich mit dem brief daz fuer mich kom in der Burgerschrann da ich sas daselbs an offem gericht, der erber geistlich Brueder Hanns Conventprueder datz den Minnoren pruedern zu wienn, und klagt mit vorsprechen an stat der er-bern Geistlichen herren daselbs datz den Minnoren pruedern auf Niclas des Ungruen vor Schotten-tor zu Wienn und Kathrein seiner hausfrawn haws daz gelegen ist vor Schottentor auf der Allsser- strazz da selbs, zunagst Hannsen des Volmans haws mit ainem tail davon man jêrlich dient den egenanten geistlichen herren zu den Minnoren pruoderen zu wienn fuenfundviertzig phenning zu purkrecht und hintz sand Maria Magdalen daselbs vor Schottentor ein wanndlung kertzen von vier pfunten wachs an unser frawn tag zu der liechtmess zu Selgrêt und nicht mer umb drew phunt wienner phenning geltes versessens purkrechtz, und umb alle die zwispild die mit Recht darauf ertailt und gegangen wêren, und klagt darumb so lang untz daz mit frag und mit urtail geviel, Ich solt Im beschawpoten darauf geben die daz obgenant haws beschauten und schêtzten, und ge-schêch darnach waz Recht wêr. Des gab ich Im Alexen Gerharten und Hainreichen den Halser paid vorsprechen die koemen da wider fuer mich und offens gericht und sagten bey Iren trewn als Sy zu Recht solten nach der stat und schrannrechten zu wienn daz Sy das egenant haws mit aller seiner zuegehoerung und mitsambt den umbsêssen daselbs aigenlich beschawt und geschêtzt hieten daz das als tewr nicht werd wêr, als daz versessen purkrecht und die zwispild die mit Recht darauf ertailt und gegangen wêren und bracht auch der obgenant prueder Hanns darumb den tag envollen mit paiden vorsprechen auch nach der stat und schrannrechten daselbs und pat auch darauf ze fragen waz nue ein Recht wêr, da geviel Im mit frag und mit urtail, Er solt mir mein Recht geben daz hat er getan und solt ich In an stat der egenanten geistlichen herren datz den Minnoren pruedern zu wienn des vorgenanten haws gêntzlich gewaltig machen mit meinem gerichtsprief daz hab ich getan, Also daz er damit hanndelen sol nach der Stat und schrann-rechten zue wienn, und solt ich Im des an stat der yetzbenanten geistlichen herren datz den Minnoren pruedern daselbs mein urkund geben, des zu einem offenn waren urkund gib ich Im den brief besigelten mit meinem anhangundem Insigl. Geben zu wienn an freitag vor sand Merten tag Nach kristi gepuerd viercehenhundert jar darnach Im sechsunddreissigistem jare.

Source Fulltext: Peter Peusquens