Ich Margreth Ulreichs des Milbitzer hausfraw Bekenn offenlich mit dem brief daz Ich demselben meinem mann, Ulreichen dem Milbitzer, an meiner stat gantzen gewalt gegeben hab und gib Im auch den wissentlich in kraft des briefs, von wegen der fuenftzig pfunt wienner pfenning So mich und Agnesen, Niclas des Reisnêr hausfrawn, mein Muem seligen von weilent der erbern frawn Kathrein der Prechtlinn unser Muemen sêligen anerstorben und geerbt und in den Rat der Stat zu Wienn nydergelegt worden sind Also beschaidenlich daz der vorgenant Ulreich Milbitzer an meiner stat gantzen gewalt haben sol dieselben Summ phenningen an die ersamen weisen..den Burger-maister und den Rat der Stat daselbs zu Wienn zu vordern intzunemen und intzubrengen mit dem rechten darumb vor gerichten zuchlagen oder sich aber an recht mit der mynn darumb zuberich-ten wie sich das gebueret zu gewin oder zu verlust und was er also von meinen wegen darum hanndelt tuet oder laesst daz ist alles mein guetlicher will zuglicher weis als ob ich selber da zugegen wêr, und gelob auch das gantz und gar stêt zuhalden mit meinen trewn angevêrd Mit urkund des briefs besigelt mit des erbern herren hern Hainreichs des Petterl pfarrêr zu Stêmes-torf und des edeln Joergen des Mawrbekchen paider aufgedrukten Insiglen die ich zu getzeug-nuess der sachen darumb vleizziglich gepeten hab In und Iren erben an schaden Darunder ich mich mit meinen trewn angever verpind stêtzuhalden das vor-geschriben stet. Geben an Mittichen vor dem heiligen prehen tag Anno domini etc. XXXVIImo.

Source Fulltext: Peter Peusquens