Ich Hanns Lengkêr Bekenn von des hauss wegen gelegen in der Kêrnêrstrass zue wienn genant die Altkanzley und stoesset in die krugstrass mit ainer seytten und mit der andern zenagst Hebreins des pekchenhaws, das weilent her Hainreich der verber mein vetter, mir und Hainreichen dem Lengkêr meinem Brueder seligen geschafft hat, und von demselben Hainreichen gantz erblichen an mich komen ist, des mich die Ersamen weisen herren her Hanns der Steger zu den zeiten Burgermaister und kellermaister und der Rat gemain der Stat zue wienn durch vleissiger bet willen nutz und gewer in Irm gruntbuech gesatzt habent, in dem Rechten als hienach geschriben stet. Also das Ich von datum des briefs ynner dem nagsten jar ain erbere hausfrawn elichen nemen, und damit das egenant haws selber Imhaben und besitzen, und alles das davon leyden, steueren und geben, und der Stat in allen sachen gehorsam und gewêrtig sein sol und wil, als ander gesessen mitburger daselbs schuldig sind ze tuen, an all auszug und widerred getreulich und ungevêrlich. Têt Ich aber des nicht, so sol und wil Ich dann, nach der egemelten jarsfrist, darnach ynner dem nagsten Moneyd, das obgenant haws verkauffen und vertigen ainem mitburger hie zue wienn, der mit der Stat in allen sachen leydet, und nyemand anderm. Têt Ich aber des auch nicht, so sol dann das eyenant haws, der vorgenanten Stat mit gantzem Rechten vervallen sein an alle genad, und suellen und muegen auch sich des..der Burger maister und der Rat zu der Stat hannden, an alles berechten, gentzlich underwinden, und das selber verkauffen und geben wie und wem si wellen. Dawider Ich noch mein erben, noch nyemands von unsern wegen nichts Reden hanndeln noch tuen suellen noch wellen weder vil noch wenig in kainerlay weis. Das gelob, und versprich Ich In alles fuer mich und all mein erben, stêtzuhalden und zevolfuern mit meinen trewn an aides stat ungevêrlich Mit urkund des briefs besigilt mit der erbern Kunrats des Rottingêr und Micheln des Lienvelder baid burger zue wienn Aufgedruckten Insigiln, die Ich zue gezeug nuesse der sach mit vleiss darumb gebeten hab In und Irn erben an schaden. Darunder Ich mich mit meinen trewn verpinde alles das stêt und vesst zehalden so vorgeschriben stet. Geben zue wienn an freitag vor sand Joergen tag Anno domini etc. Tricesimo septimo.

Source Fulltext: Peter Peusquens