Unnser gehorsam dinst mit guetem willen wisst allzeit bevor wir lassen euch wissen das dy Soeldner In den geslossen auf der marich pey einander gewesen sein hie zu Laa und sich mit-einander underRett haben und ainig warden seinn auf soleiche maynung das sie iren vordinten sold maynn zu haben von unnserm gnaedigistem herren dem kunigk romischen etc. oder awer von dem land Osterreich zu haben und des nicht lennger maynn zu vartten Dorauf bitten wir euch all und ewr yetwederen besunder ier wellet die Raet des landes Osterreich ermann und bitten dortzue underweisen das die soldner ires vordientten sold von unnserem genaedigisten herren dem kunigk etc. betzalt werden damit uns land und lawten icht furbas schaden doraus gee wenn wir wol vornomen haben und vorstannden das Jorig von Seysenekk yetz haubtman zu Laa oder awer sein anwalt nicht lennger gegen In fuergehalten mag dorInn wir ein fuersorig haben und wissen nicht wes wir uns gegen In halten sullen Geben zu Laa am Vaschang tag anno etc. Quadragesimo primo Kaspar Tannbergk Phleger zu Laa Richter und Rat daselbs

Source Fulltext: Peter Peusquens