Von gottes genaden Albrecht phallnntzgraf bei Rein Hertzog In Bayern und Grave zuo voburg etc. Unnsern gunstlichen grus bevor lieben besundern. Als Ir uns yezo von Hannsen Urssentalers und Hannsen Vachners unser Burger zuo Munchen wegen geschriben und gebetten habt, under anderm, mit In zeschaffen und sy darzuo ze bringen, daz sy Recht von Hannsen Kewschen Burger ze Wienn daselbs nemen, wann In doch Recht nicht verzogen sei und sei In noch willig Recht wider gen ze lassen wenn sy des begernd nach Innhallt ewrs briefs, haben wir wol vernomen. Allso tuen wir ew zewissen das wir von ewr pet wegen mit den obgenanten unsern Burgern geredt und sy sovil erweist haben, das sy Ire Recht zuo westvaln gen dem Kewschen ansten lassen wellen, wie wol sy dez als sy mainen nicht schuldig warn doch allso das In von dem Keuschen umb Ir schuld onverziehen fuderlich und enndtlich Recht vor dem StatgeRicht zuo Wienn und bezalung widerfar und vollgee, herauf so begern wir mit sunderm ernst von ew Ir wellet daran sein daz den unsern gen dem Kewschen allso In kurtz und onverziehen Rechttag beschaiden werd und umb Ir schuld gen Im enndtlich Recht und bezalung ergee und widerfar als der Stat zuo Wien Recht, und so das beschehen ist, wellen die unsern Ire westvalische Recht alsdann ganntz vallen lassen, verstet Ir selbs wol daz die unsern daran mer tuen dann sy schuldig sein. Beschaeh aber dez nicht, und wird In der sach In obgeschribner maß nicht In kurtz ennd So muesten wir In vergonnen, daz sy Irn angefangen westvalischen Rechten fuero gen dem Kewschen zuo ennd nachgiengen als sich gepurte und Ir notdurfft waere. Geben zuo Munchen an mittichen vor sanndt Michels tag, anno domini etc. XLImo.

Source Fulltext: Peter Peusquens