Leonartt von gotes genaden Bischofe ze Passawe. Unsern grus bevor Erber lieber gevatter. Uns hat yetz furpracht der gegenwurtig Leonart Coler unsers getrewen Virgili Venediger, unsers purgers ze Passawe diener als er demselben seinem hern, ettlich Sueß wein yetz herab gen Stain bracht, und die Nu wider aufgeladen, und anworden hab, sind die von deinen wegen deselbst ver-poten, die er an der stat, hab von deinem Anwallt, muessen ausznemen umb anderhalbhundert gulden, von ainer vordrung wegen die du darInn maynest ze haben. Nu vernemen wir der benant unser purger, hab vormalen mer jar soellich wein auch herabgefuert, daran Im doch kayn Irrung sey geschehen. Darumb wir dich mit sunderm vleisse piten, daz du den benanten unsern purger und seinen diener an seiner stat sollicher sach uns zu gevallen Gantzlich ledig lassest und be-gebest, das wellen wir mit willen gern umb dich ..schulden. Geben zu sand Pollten an Sontag vor sand Leonharts tag Anno etc. XLImo. Urk. 2840 b r Ob du aber ye ettwas darInn maynest ze haben, so wellest doch desselben bey uns beleiben, In dem wellen wir dich selbs bedencken, darumb Begern wir dein verschribne Anttwurt.

Source Fulltext: Peter Peusquens