Unsern freuntlichyn dinst zuvor erbern weisen Gunstigen liben freunde Als ir uns vormols habt geschreben und kunt gethan wie der Augustinus bekant hab das er einer frawe genant Schon Anna zu Brunn tzwe Silberin Gurtel die Niclasen des Panhalms seines herren gewesen seyn zu getrewer hant hab zugehaldin gebin etc. dieselbig bekanntnus habin wir den herren zu Brunn zugeschreben und gebeten, das sy dornoch frogen und darzu thun solden das dem unsern sein Gut wider wurde dy habin uns dorumb Ir antwurt getan, alz er das ander apschrifft Irs Briffs hy Inne beslossen wol werdet vornemen dovon so Beten wir euch von des egenanten Panhalms wegen der uns dorumb angeruft hot Ir wellet den egenanten Augustin der in ewer venkgnus ist ernstlich frogen ab ym noch des Gutes so Im der egenante Augustin gestolen hot Ichts mocht getzaigt und wider werden und denn verrer mit dem gevangen handeln noch seim vorschulden als recht ist und umb solich sachen gepurt. Gegeben zu Wienn an Samstag vor sand Anthonien tag Anno domini etc. Quadragesimo Secundo. Den Erbern weisen und forsichtigen .. dem Burgermeister und dem Rat zu Troppaw unsern gunstigen liben freunden. Burgermeister Richter und der Rat der Stat zu Wien.

Source Fulltext: Peter Peusquens