Allen und eynem iglichem besunder dy mit desem priffe besucht werden Empitten wir Purger-meyster Ratlewte, und dy Elder der Stat Troppaw unsern freuntlichen dinst, und vorkundigen mit diesem priffe Also als dy Erbere Katherina leipstendige zeygerynne ditz prifes mit sampten irer armen mutter von vordechtnis und bescholdigung wegen des Erbern Panhalms purgers zu Wyhen yn das gefengnis brocht wurden umb forlost etzlicher cleynot und gutter wegen dorynne ouch dy Erbern ffrawen grosse marter smertzyn und wertliche schande geliden, und zu dem toede vor-orteylt wurden und ap gebeten sint, und no in das pfunfte yor aws Osterreych und Merhern geweyst und geechtet seint wurden, und yn desem yore an unserm jormargt umb sand Symonis und Jude der Czwelfboten hot dy Katherina zu uns eynen knecht mit namen Augustin etwan Panhalms dyner in das gefengnis brocht, ein scholt gebende das sie von seynem wegen suttene marter und wertliche schande geliden hette mit yr mutter, und in des hot dye Katherina uns gebethen umb sye den Wiener, und dem Panhalm umb sichir gleyt zu schreiben ir zu eu und erwedir von eu zu komen, das wir alles von rechts wegen gethon haben und dy arme frawe sich gemueet hot ken wyen und erwedir und mit yr brocht, der Wiener und Panhhalms poten zu vorsichern wie em umb den gefangen und dy sachen were unde do der wiener pot yn kegenworti-keyt des Augustini kwam mit dem gerichte und ouch der Katherina Do hub an der gefangener von dieser frawen zu bekennen off seyne letzte pfart, das sy an der dyberay keyne scholt nicht en hette mit der tote noch mit worten wy wol er no sege das er von ir seyn leyp vorlysen muste, und also hot er dieser frawe und irer mutter firstunt bekant, vor seyner marter yn der marter und noch der marter und als er denne noch lebet, dasselbe bekennet, und wir en aldo lossen sitzen zu der wyener willen bis yr botschaft wedirkeret, und sint deme mole sich der armen ffrawen unscholt selbir meldit, von dem selbschuldigem dybe der off sich selbir bekant hot wie er dortzu komen ist und wo er es hyn gethon hot Bitten wir alle und eyn yden besunder diesen armen frawen und Hanuschko Nymptzer erem elichen manne en mitleidiclichin irer eren beyzusteen und yr unschicht nicht zu arge zu wenden sint sich des ungeluckis nymandis gehutten mag oder kan. Gegeben zu Troppaw am freytage vor Cristage noch Cristi geborth Tawsend firhundert yor und yn dem eyn und fyrtzigistem yore cristi.

Source Fulltext: Peter Peusquens