Fursichtig Ersam wolweis und Namhaft herren unser willig dinst in allem wolgevallen bevor Gunstig herren wir lassen euer fursichtichait wissenn, daz wir yetz ervordert sein von den Namhaften fursichtigen herren den Anwelten und Raeten in Osterreich zu ainem tag den vor in bey euer mittel ze besuchen, von wegen der zwitracht zwischen unser und her Hilbrantz Fuchsen auch durch anderer meniger underrednuss wegen dye wir mit euer fursichtichait und den euern haben zu betrachten DarInn wir doch ettwas fuersarg habenn solich rais zu volfuren an gelaitt von meniger irrung wegen So uns dann yetz in den leuffen mochten ergeen und ervolgen. Dadurch so bitt wir euer fursichtig weishait in allem fleis Ir wellet uns getreus brieflichs gelaitt fur euch die euern ouch aller menichlich der euern auf zehen person und viertzehen tag zu sennden und uns vergunnen solichs ze geben damit wir an irrung zue euer fursichtichait in der zeit mogen komen bey euch ze sein und furbas an unser beruebte gewarsam zechomen die weil wir uns zu euch dann auf solichs getreus gelait wellen fuegen zu underrednuss meniger unser notturft und lat uns ouch in den und andern sachen bevolhen sein, nach solichem vertraun als wir dann ganntz zu euch habenn, das wellen wir in allem willen getreulich umb euch und all dy euern in allem wolgevallen verdienn. Datum zu Prespurg an pfintztag vor sant Matheus tag Anno domini etc. Quadragesimo Secundo. Richter und Rate der Stat zu Prespurg.

Source Fulltext: Peter Peusquens